ԶԱՐԹՕՆՔ», ՊԷՅՐՈՒԹ – Ոստիկանութեան պետ Վալերի Օսիբեանը խորհրդակցութիւն ունեցաւ ոստիկանութեան զօրքերու վարչակազմի եւ ենթակայ զօրամասերու հրամանատարական կազմի հետ:
Ինչպէս կը փոխանցէ «Արմէնփրես»-ը, հասարակայնութեան հետ կապի եւ լրատուութեան վարչութենէն կը տեղեկացնեն, որ ոստիկանութեան զօրքերու առաջին հերթափոխը Օգոստոս 23-ին պիտի պատրաստուի մեկնիլ Տաւուշի մարզ` մարտական դիրքերը պաշտպանելու: Խորհրդակցութեան նպատակն էր մարտական հերթափոխէն առաջ ճշդել ոստիկանութեան զօրքերու պատրաստուածութեան վիճակը, տալ համապատասխան հրահանգաւորումներ:
«Ոստիկանութեան զօրքերը կ’առանձնանան իրենց կարգապահութեամբ, եւ այսօր ձեր ծառայութենէն կախուած է նաեւ ոստիկանութեան հեղինակութիւնը: Դուք ունիք տարիներու փորձ, բաւարար պատրաստուածութիւն, նաեւ այնպիսի հրամանատարներ, որ մարտական ուղի անցած են, եւ աւելի քան վստահ եմ, որ կրնաք պատուով կատարել ձեր առջեւ դրուած մարտական առաջադրանքը»,- ըսած է ոստիկանութեան պետը:
Վալերի Օսիբեանը յիշեցուցած է, որ ապրիլեան քառօրեայ պատերազմի ժամանակ ոստիկանութեան զօրքերը որքան կազմակերպուած եւ պատուով կատարեցին իրենց խնդիրը, օրինակ բերաւ, թէ ոստիկանները ի՛նչպէս հերոսաբար կը կռուէին արցախեան ազատամարտի տարիներուն:
Խորհրդակցութեան ընթացքին քննարկուած են ծառայութեան հետ կապուած այլ հարցեր եւս:
Ոստիկանութեան զօրքերու հրամանատարի ժամանակաւոր պաշտօնակատար, ոստիկանութեան գնդապետ Սամուէլ Յակոբեանը զեկուցած է, որ մարտական հերթափոխի մեկնող զօրամասը պատրաստ է իր առջեւ դրուած խնդիրները կատարելու:
Վալերի Օսիբեանը ոստիկաններուն անփորձանք ծառայութիւն մաղթած է:
«Ես անձամբ առաջին իսկ հնարաւորութեան պարագային պիտի ըլլամ դիրքերու վրայ, ձեր կողքին: Պատիւ ունիմ ծառայելու ձեզի հետ, հպարտ եմ ձեզմով»,- ըսաւ ոստիկանութեան պետը:
