«ԶԱՐԹՕՆՔ», ՊԷՅՐՈՒԹ – Оգոստոս 24-25 պաշտօնական այցով Հայաստան պիտի ժամանէ Գերմանիոյ Դաշնային Հանրապետութեան վարչապետ Անկելա Մերքելը: Այցի ծիրէն ներս պիտի կայանան հայ-գերմանական բարձր մակարդակի բանակցութիւններ ՀՀ վարչապետ Նիկոլ Փաշինեանի եւ ԳԴՀ վարչապետ Անկելա Մերքելի գլխաւորութեամբ:
Ինչպէս կը փոխանցէ «Արմէնփրես»-ը, ՀՀ կառավարութեան տեղեկատուութեան եւ հասարակայնութեան հետ կապերու վարչութենէն կը տեղեկացնեն, որ Հայաստանի վարչապետը եւ Գերմանիոյ վարչապետը բանակցութիւններու արդիւնքները պիտի ամփոփեն համատեղ մամուլի ասուլիսի ժամանակ: Այցելութեան ծիրէն ներս վարչապետ Անկելա Մերքել հանդիպում կ’ունենայ նաեւ ՀՀ նախագահ Արմէն Սարգսեանի հետ:
Գերմանիոյ վարչապետը կ’այցելէ Ծիծեռնակաբերդի յուշահամալիր՝ յարգանքի տուրք մատուցելու Հայոց Ցեղասպանութեան զոհերու յիշատակին։
