«ԶԱՐԹՕՆՔ», ՊԷՅՐՈՒԹ: Հայաստանի Հանրապետութեան երկրորդ նախագահ Ռոպերթ Քոչարեանը կալանաւորելու շտապողականութիւն կար. իրաւական գործընթացները պէտք է ոսկերչական ճշգրտութեամբ ընթանային:
«Արմէնփրես»–ի հաղորդմամբ՝ լրագրողներուն հետ զրոյցի ընթացքին այսպիսի կարծիք յայտնեց «Ընդդէմ իրաւական կամայականութեան» ՀԿ գործադիր տնօրէն Լարիսա Ալավերդեանը:
«Ես Ռոպերթ Քոչարեանի նախագահութեան ժամանակ ամենաշատը տուժած եմ, քաղաքական հետապնդումի ենթարկուած: 2008 թուականին Ազգային ժողովին ես յայտարարած եմ, որ Մարտ 1-ի դէպքերուն պատասխանատուութիւնը կը կրէ ՀՀ երկրորդ նախագահը: Պատասխանատուութիւնը բան մըն է, մեղքը՝ այլ: Ես այդ խնդիրին մասին արտայայտուած եմ, եւ ցանցային շատ մեծ բողոք եղած է, բայց իմ լսարանս ընկերային ցանցը չէ, այլ գրագէտ եւ բանիմաց լսարանը»,- նշեց Ալավերդեանը:
Իր պնդումով՝ այս գործին մէջ շտապողականութիւնը նոր իշխանութիւններուն կը խանգարէ միայն: «Ընդդէմ իրաւական կամայականութեան» ՀԿ գործադիր տնօրէնը կոչ ըրաւ ըլլալու շատ սթափ, հաւասարակշռուած եւ հետեւիլ միջազգային իրաւունքի, օրէնքի գերակայութեան:
Ալավերդեանը վստահութիւն յայտնեց, որ Ռոպերթ Քոչարեանը խոցելի կ’ըլլար այլ յօդուածներու կիրարկմամբ, օրինակ՝ ապօրինի հարստացման:
