«ԶԱՐԹՕՆՔ», ՊԷՅՐՈՒԹ: Արտաքին գործոց նախարարի պաշտօնակատար Ժպրան Պասիլ յառաջիկայ շաբաթ պիտի ուղղուի Մուսկուա՝ սուրիացի գաղթականներու տունդարձը իրագործելու նպատակով ռուսական կողմի առաջադրած ծրագիրի պարագային յաջորդ քայլը նախաձեռնելու համար: Այս մասին Երկուշաբթի հաղորդեց «Սփութնիք»-ը:
«Պասիլ Օգոստոս 20-ին պիտի մեկնի Մուսկուա, ուր բանակցութիւններ պիտի վարէ իր ռուս գործընկերոջ Սերկէյ Լաւրովի հետ»,- գործակալութիւնը մէջբերած է արտաքին գործոց նախարարութեան աղբիւրի հաղորդումը:
Ըստ աղբիւրին՝ բանակցութիւններուն առանցքային թեման պիտի ըլլայ գաղթականներու տունդարձը ի կատար ածելու նպատակով Ռուսիոյ ներկայացուցած ծրագիրն ու այդ ծիրէն ներս նախաձեռնուելիք անհրաժեշտ քայլերը, ինչպէս համակարգային համատեղ յանձնաժողովի ձեւաւորումը տարածաշրջանային պետութիւններու հետ, ներառեալ Լիբանանը:
