«ԶԱՐԹՕՆՔ», ՊԷՅՐՈՒԹ: Ազգային ժողովի պատգամաւոր Մանուէլ Գրիգորեանի պաշտպանները բողոք ներկայացուցած են Վճռաբեկ դատարան իրենց պաշտպանեալի նկատմամբ կալանքը որպէս խափանման միջոց կիրարկելու առաջին ատեանի դատարանի որոշումին դէմ: «Արմէնփրես»-ի հետ զրոյցի ընթացքին Մանուէլ Գրիգորեանի պաշտպան Արսէն Մկրտչեան նշեց, որ առայժմ վարոյթ ընդունելու մասին որոշում չեն ստացած:
«Թէ՛ առաջին ատեանի դատարանին, թէ՛ Վերաքննիչ դատարանին մէջ բազմիցս ըսած ենք, որ Մանուէլ Գրիգորեանի կեանքին վտանգ կը սպառնայ, սակայն դատարանները ապօրինի որոշումներ կայացուցած են»,- ըսաւ Մկրտչեանը:
Իր խօսքով` Մանուէլ Գրիգորեանը կը տառապի քաղցկեղով, շաքարախտով, ինչպէս նաեւ յարակից այլ հիւանդութիւններով:
Հարցին, թէ արդեօք իրականացուա՞ծ է բժշկական փորձաքննութիւն, Մկրտչեանը ըսաւ, որ ընթացքի մէջ է:
ՀՀ Ազգային ժողովի պատգամաւոր Մանուէլ Գրիգորեանին մեղադրանք առաջադրուած է ՀՀ քրէական օրէնսգիրքի 235-րդ յօդուածի 2-րդ մասով՝ ապօրինի կերպով ռազմամթերք ձեռք բերելու եւ այլ անձերու հետ նախնական համաձայնութեամբ պահելու համար, ինչպէս նաեւ ՀՀ քրէական օրէնսգիրքի 179-րդ յօդուածի 3-րդ մասի 1-ին կէտով՝ խումբ մը անձերու հետ նախնական համաձայնութեամբ իւրացման եղանակով իր վստահութեան յանձնուած առանձնապէս մեծ չափերով ուրիշի գոյքը յափշտակելու համար:
Մանուէլ Գրիգորեանի նկատմամբ որպէս խափանման միջոց ընտրուած է կալանաւորումը:
