Հայաստանի Հանրապետութեան վարչապետ Նիկոլ Փաշինեան Ս. Փեթերսպուրկի մէջ մասնակցած է Եւրասիական միջկառավարական խորհուրդի հերթական նիստին: Ինչպէս կը փոխանցէ«Արմէնփրես»-ը, ՀՀ կառավարութեան տեղեկատուութեան եւ հասարակայնութեան հետ կապերու վարչութենէն կը տեղեկացնեն, որ ԵԱՏՄ անդամ պետութիւններու կառավարութիւններու ղեկավարներու նեղ կազմով նիստին հետեւած է համատեղ լուսանկարման արարողութիւնը, որմէ անմիջապէս ետք անդամ պետութիւններու վարչապետները մասնակցած են ընդլայնուած կազմով խորհուրդի աշխատանքներուն:
Խորհուրդը նախ ի գիտութիւն ընդունած է նախորդ նիստին տրուած յանձնարարականներու կատարման զեկոյցը, այնուհետեւ անցած է օրակարգային հարցերուն: Նիստի ընթացքին ԵԱՏՄ անդամ երկիրներու վարչապետները քննարկած են տնտեսութեան, մաքսային, ուժանիւթի, փոխադրամիջոցներու եւ այլ ուղղութիւններով փոխգործակցութեան խորացման վերաբերող հարցեր: Մասնաւորապէս, անդրադարձ կատարուած է ԵԱՏՄ թուային օրակարգին, արդիւնաբերական եւ մաքսային համագործակցութեան, ինչպէս նաեւ ԵԱՏՄ իրաւանորմաթիւային հիմքը կատարելագործելու հարցերուն։ Քննարկուած են նաեւ օդագնացական պատահարներու հետաքննութեան մարմինի ստեղծման ու կազի ընդհանուր շուկայի ձեւաւորման ուղղուած հարցեր:
Խորհուրդը որոշած է ստեղծել բարձր մակարդակի աշխատանքային խումբ, որ պիտի զբաղի համագործակցութեան եւ արդիւնաբերութեան բնագաւառներուն մէջ ներմուծման փոխարինման հարցերով:
Եւրասիական միջկառավարական խորհուրդը որոշում ընդունած է խորհուրդի յաջորդ նիստը գումարել 2018 թուականի աշնան Պելառուսի մէջ:
