Հայկական ֆիլմի ընկերակցութիւնը, որ մօտաւորապէս երեք տարի առաջ հաստատուած էր՝ առաջնորդութեամբ Արմէն եւ Մերի Քարօղլանեաններուն եւ համագործակցութեամբ «Ապրիլ» գրատան, վերջերս վերածուեցաւ անդամակցութեամբ ընկերակցութեան մը, որուն անդրանիկ ձեռնարկը տեղի պիտի ունենայ Ուրբաթ, Օգոստոս 3-ին՝ երեկոյեան ժամը 7:30-ին, «Ապրիլ» գրատան մէջ (415 E. Broadway, Glendale): Անդամակցութեան մանրամասնութեանց համար դիմել (818) 243-4112 թիւին։ Այս մասին կը հաղորդէ «Ասպարէզ»-ը։
Սոյն ձեռնարկին պիտի ցուցադրուի Աւօ Ճան Քամպուրեանի բեմադրած՝ «Վերապրումի Արձագանգներ» («Echoes of Survival») փորձառական վաւերագրական ֆիլմը, որ նուիրուած է խումբ մը ամերիկահայ արուեստագէտներու, ներառեալ՝ Ճեքի Ղազարեանի, Արա Տինքճեանի, Արա Օշականի, Սքաութ Թիւֆէնքճեանի, Ճան Պէրպէրեանի եւ անոնց ստեղծագործութեանց մէջ հայ ինքնութեան ունեցած դերակատարութեան։
Հայկական ֆիլմի ընկերակցութեան նպատակն է ի մի բերել շարժապատկերի սիրահարներ՝ ֆիլմեր դիտելու եւ անոնց մասին քննարկումներ կատարելու նպատակով: Կը ծրագրուի նաեւ աշխատանիստեր եւ դասախօսութիւններ կատարել այդ ընթացքին:
Յաւելեալ տեղեկութեանց համար դիմել (818) 243-4112 թիւին կամ noor@abrilbooks.com ու armenkaraoghlanian@yahoo.com հասցէներուն:
