ԳԷՈՐԳ ՉԻՉԵԱՆ
Յուլիս 20-ին ԱՀ մշակոյթի, երիտասարդութեան հարցերու եւ զբօսաշրջութեան նախարարութեան հրաւէրով Շուշիի կերպարուեստի պետական թանգարանին մէջ տեղի ունեցած է օփերայի աշխարհահռչակ երգչուհի, ՀՀ ժողովրդական արուեստագիտուհի Յասմիկ Պապեանի մենահամերգը: Ծրագիրին մէջ հնչած են հանրայայտ օփերայի արեաներ եւ հայ մեծանուն երգահան Կոմիտասի ստեղծագործութիւնները:
Մենահամերգին ներկայ եղած են Արցախի թեմի առաջնորդ Գերաշնորհ Տէր Պարգեւ արքեպիսկոպոս Մարտիրոսեան, ԱԺ փոխնախագահ Վահրամ Բալայեան, ԱՀ մշակոյթի, երիտասարդութեան հարցերու եւ զբօսաշրջութեան նախարար Լեռնիկ Յովհաննիսեան, գեղանկարիչ Սամուէլ Սեւադան եւ ուրիշներ:
«Առաջին մենահամերգս Արցախի մէջ կայացած է 2010 թուականին` Արցախի Կամերային նուագախումբի ղեկավար Գէորգ Մուրադեանի հրաւէրով: Արցախ կատարած այցելութենէս յետոյ կրնամ ըսել, թէ արցախցիներուն համար այսպիսի հանդիպումները որքան կարեւոր են, անոնք կարծես` կարօտ են համաշխարհային օփերայի արուեստի գլուխ գործոցները լսելուն»,- «Հայերն այսօր»-ի հետ զրոյցին ըսաւ Յասմիկ Պապեան` աւելցնելով, որ դահլիճին մէջ նկատած է մեծ թիւով երիտասարդներու, որ կը փաստէր, անոնց համար օփերայի արուեստը հանապազօրեայ հացի նման կարեւոր է:
Յասմիկ Պապեան Արցախ կատարած այցելութեան ծիրէն ներս եղած է նաեւ Տող գիւղի արուեստի դպրոցին մէջ, ուր հանդիպած է սաներուն հետ եւ հիացած անոնց աշխատանքներով:
Օփերայի ճանչցուած երգչուհին զօրամասերէն մէկուն մէջ զինուորներուն հետ հանդիպումով շատ տպաւորուած է, հասկցած է, որ անոնք մարտական բարձր ոգի ունին եւ պատրաստ են խիզախաբար մարտնչելու հայոց սահմաններու անսասանութեան համար:
«Մեր տղաներուն ժպիտներէն ու անկեղծ ուրախութենէն շատ յուզուած եմ, երեք զինուոր նաեւ ինծի համար երգեցին: Շատ հաճելի էր շփուիլ մեր զինուորներուն հետ, միասին զրուցել տարբեր թեմաներու շուրջ, մեր կարճ հանդիպման ընթացքին փորձեցի անոնց մայրական գուրգուրանք փոխանցել եւ ըսել, թէ որքան կարեւոր են մեզի համար»,-ըսաւ Յասմիկ Պապեան` ընդգծելով, որ այցի ընթացքին հասկցած է` զինուորի կողքին կանգնելու եւ արուեստով զբաղուիլ ցանկացող երեխաներուն սատարելու անհրաժեշտութիւնը:
