ՀՀ պաշտպանութեան նախարար Դաւիթ Տօնոյեան Յուլիս 20-ին ընդունած է ՀՀ-ի մէջ Սուրիոյ Արաբական Հանրապետութեան արտակարգ եւ լիազօր դեսպան Մուհամմատ Ահմատ Հաճ Իպրահիմը:
Ինչպէս «Հայերն այսօր»-ին կը յայտնեն ՀՀ պաշտպանութեան նախարարութենէն, դեսպանը պաշտպանութեան նախարարին ներկայացուցած է Սուրիոյ մէջ տիրող ռազմական եւ տնտեսական իրավիճակը: Մուհամմատ Ահմատ Հաճ Իպրահիմը իր երախտագիտութիւնը յայտնած է հայկական կողմին` Սուրիոյ ժողովուրդին ուղարկուած մարդասիրական օգնութեան հերթական խմբաքանակին համար:
Իր հերթին ՀՀ պաշտպանութեան նախարարը յոյս յայտնած է Սուրիոյ մէջ բնականոն կեանքի շուտափոյթ վերականգնման վերաբերեալ եւ նշած, որ Հայաստան կը շարունակէ բարեկամ սուրիացի ժողովուրդին օգնութեան փուլային տրամադրման գործընթացքը:
Քննարկուած են նաեւ Սուրիոյ մէջ հայ համայնքին վերաբերող հարցեր, ինչպէս նաեւ Հայաստանի Հանրապետութեան կողմէ համայնքին հնարաւոր աջակցութեան եղանակները:
Կարծիքներ փոխանակուած են տարածաշրջանային եւ միջազգային անվտանգութեան խնդիրներուն շուրջ:
