*ՍԵՒԱԿ ՅԱԿՈԲԵԱՆ*
Հիմա, որ վերջ գտաւ ֆութպոլի աշխարհի բաժակախաղը ատենն է այլեւս սթափելու ամէն տեսակի ֆութպոլային զբաղուածութենէ ու գրաւներէ, իրար քաշքշելէ եւ այլ երկիրներու յաղթանակը տօնելէ ու կեդրոնանալու միայն ու միայն մեր Հայրենիքին ապահովութեան ու բարօրութիւններուն վրայ:
Մինչ մեր երկիրը կ՛ապրի ճգնաժամ ու ամէն տեսակի մարտահրաւէր, ատենն է, երկրպագութեան որպէս միակ ու համաձուլուած առարկայ ընտրենք միայն ու միայն Հայաստան, Արցախ, Մայր Աթոռ եւ Հայ Բանակ քառասիւն կառոյցը:
Ատենն է, որ վերադառնանք իրական կեանք՝ գիտակցելով այն բոլոր վտանգները, որոնք կը սպառնան այս կառոյցին, որովհետեւ առանց անոր անիմաստ են սփիւռքներն ալ, հայապահպանումն ալ, որպէս Հայ մեր գոյութիւնն ալ:
Եկէք գիտակցինք, որ երբ թշնամին յարձակի ան պիտի չզանազանէ ո՛չ ֆրանսասէրը, ո՛չ ալ ռուսասէրը: Ո՛չ իշխանամէտը, ո՛չ ալ ընդդիմադիրը: Ո՛չ նոր Հայաստանը, ո՛չ ալ հինը՝ իր նոր կամ հին Հայրապետով:
Վտանգը մեր դրան առջեւն է սիրելիներ: Սթափինք:
