Համաշխարհային գործարար միջավայրի մէջ նշանակալի դերակատարութիւն ունեցող յայտնի հայ գործարարներու նախաձեռնութեամբ ստեղծուած է ներդրողներու խումբ, որ կը յայտարարէ «Կառուցի՛ր Հայաստան» («Build Armenia») նախագիծի մը մեկնարկին մասին:
Ըստ Armenpress.am-ի՝ «Կառուցի՛ր Հայաստան» նախագիծին նպատակն է ապահովել հայրենադարձութիւնը խթանող լայնածաւալ ներդրումներու հոսք դէպի Հայաստան, ստեղծել հասարակական-տնտեսական նպաստաւոր միջավայր, որ համապատասխան ենթակառուցուածքներու հիման վրայ ի վիճակի պիտի ըլլայ ընդունելու հայրենադարձութեան ինքնահոս ալիքը:
Նախաձեռնողները «Կառուցի՛ր Հայաստան» նախագիծին մեկնարկով հանդէս կու գան ելեւմտական ու աշխարհագրական ծաւալով աննախադէպ նախաձեռնութեամբ, որ պիտի ապահովէ հայրենադարձութիւնը խթանող ներդրումներու լայնածաւալ հոսք դէպի Հայաստան:
Նախագիծին շուրջ համախմբուած գործարարներու առաջին համաժողովը տեղի պիտի ունենայ 2019-ի առաջին եռամսեակին, Ֆրանսա:
