Պրիւքսելի մէջ վարչապետ Նիկոլ Փաշինեան հանդիպում ունեցած է Եւրոպական յանձնաժողովի նախագահ Ժան-Քլոտ Եունքերի հետ:
Ինչպէս կը փոխանցէ «Արմէնփրես»-ը, ՀՀ կառավարութեան տեղեկատուութեան եւ հասարակայնութեան հետ կապերու վարչութենէն կը տեղեկացնեն, որ զրուցակիցները քննարկած են ՀՀ-ԵՄ յարաբերութիւններու հեռանկարները՝ Հայաստանի մէջ տեղի ունեցած ժողովրդավարական փոփոխութիւններու լոյսին տակ: Ժան-Քլոտ Եունքերը նշած է, որ հայաստանեան զարգացումներու խաղաղ ու ժողովրդավարական բնոյթը ոգեւորած է զիրենք եւ պատրաստակամութիւն յայտնած շարունակաբար աջակցելու Հայաստանի մէջ իրականացուող բարեփոխումներու գործընթացին:
Նիկոլ Փաշինեան շնորհակալութիւն յայտնած է նախորդ բոլոր տարիներուն ցուցաբերուած աջակցութեան համար եւ հաւաստիացուցած, որ այսուհետեւ ԵՄ-ի թէ՛ ֆինանսական եւ թէ՛ խորհրդատուական աջակցութիւնը աւելի նպատակային պիտի օգտագործուի: «Հայաստանի մէջ արդէն շուրջ երկու ամիս տեւող հակակոռուպցիոն պայքարի շարունակականութիւնը մեր կառավարութեան հիմնական գերակայութիւններից է»,- ըսած է Նիկոլ Փաշինեան:
