Ռուսիոյ քաղաքացի էջատէր Ալեքսանդր Լափշինը դիմատետրի իր էջին հրապարակած է տեսանիւթ մը, որուն հեղինակը, հայ ներկայանալով, կը պատմէ, թէ ի՛նչպէս կրցած է պելառուսական անձնագիրով մեկնիլ Ազրպէյճան:
«Պելառուսական անձնագիրով հայը, որ կրցած է ժամանել Ազրպէյճան ու հասնիլ Կիանճա (Կիրովապատ) գտնուող իր ծնողներու տուն»,- ըստ Artsakhpress.am-ի գրած է Լափշին:
Ան յիշեցուցած է, որ Ազրպէյճանը, ռասիստական նկատառումներէ մեկնելով, թոյլ չի տար հայերուն երկիր մուտք գործելու: «Ինչ կը վերաբերի անոր ծնողներուն եւ Կիանճային, նշեմ, որ հայերը այնտեղէն փախած են Ղարաբաղեան պատերազմին ժամանակ, իսկ անոնց տուները այժմ ազրպէյճանցիներ կ’ապրին»,- նշած է էջատէրը՝ նկատելով, որ Ազրպէյճանի անվտանգութեան աշխատակիցները չեն արձանագրած անոր հայ ըլլալուն հանգամանքը, որուն արդիւնքով երիտասարդը կրցած է հիանալի նիւթ նկարահանել ու վերադառնալ:
«Անոր կարճատեւ ֆիլմը ցոյց կու տայ հասարակ ազրպէյճանցիներուն աղքատութիւնն ու չարութիւնը, սարսափելի հայաֆոպիան ու ամէնուր տիրող լրտեսամոլութիւնը: Ազրպէյճանէն ետք տղան մեկնած է Հայաստան, ապա Ղարաբաղ»,- գրած է էջատէրը:
Ան կը նկատէ, որ նիւթ նկարահանած երիտասարդը մեծ վտանգի դիմած է նման քայլով, քանի որ միայն Կիանճայի մէջ ուղղակի քալելն ու հայերու ձգած տուներուն մասին հարցնելը կրնար յանգեցնել երիտասարդի սպանութեան, նոյնիսկ նախքան զինք ձերբակալելը: «Կը սպասենք յաւելեալ անուն մեր պատուաւոր ցուցակին մէջ, այսինքն՝ Ազրպէյճանի «սեւ ցուցակ»-ին մէջ»,- կատակած է Լափշին:
