Յուլիս 4-ին Արցախի Հանրապետութեան նախագահի նստավայրին մէջ տեղի ունեցած է Արցախի պետական եւ Շուշիի ճարտարագիտական համալսարանները գերազանց աւարտած ուսանողներու վկայականներու յանձնման հանդիսաւոր արարողութիւնը: Այս մասին կը տեղեկացնէ ԱՀ նախագահի աշխատակազմի տեղեկատուութեան գլխաւոր վարչութիւնը:
Իր ելոյթին մէջ նախագահ Սահակեան ընդգծած է, որ գիտելիքներու հանդէպ սէրը, աշխատասիրութիւնն ու պատասխանատուութեան բարձր զգացումը շրջանաւարտներուն պիտի օգնեն զարգացնելու իրենց ունակութիւններն ու կարողութիւնները, դառնալու բարձրակարգ մասնագէտներ եւ Արցախի արժանի քաղաքացիներ, ուրոյն աւանդ բերելու հայրենի երկրի զարգացման ու շէնացման:
«Մենք միշտ հպարտութեամբ կը նշենք, որ ունինք հայրենասէր, կիրթ ու զարգացած երիտասարդներ, որոնք իրենց ծնողներու արժանի զաւակներն են եւ անոնց պէս պատրաստ են հնարաւորինս ընելու հարազատ երկրի ու ժողովուրդի համար, պաշտպանելու եւ զօրացնելու մեր անկախ հանրապետութիւնը՝ շարունակելով աւագ սերունդի աւանդոյթներն ու հայրենանուէր առաքելութիւնը»,- նշած է իր խօսքին մէջ երկրի ղեկավարը՝ աւելցնելով, որ պետութիւնը հետեւողական աշխատանք կ’իրականացնէ կրթութեան եւ գիտութեան զարգացման, երիտասարդներու համար անհրաժեշտ պայմաններու ստեղծման, ժամանակակից գիտելիքներով զինուած, առողջ ու հայրենասէր սերունդ դաստիարակելու ուղղութեամբ:
