Աւանդութեան համաձայն եւ չորրորդ տարին ըլլալով, Չորեքշաբթի, 20 Յունիս 2018-ին Քուէյթի Ազգային վարժարանին մէջ մէջ տեղի ունեցաւ ազգային բարերար, հրապարակագիր Կիրակոս Գույումճեանի կողմէ հաստատուած «Ներսէս Շնորհալի» մրցանակին տուչութիւնը:
Ի ներկայութիւն Քուէյթի թեմի Բարեջան առաջնորդ Գերաշնորհ Տէր Մասիս եպիսկոպոս Զօպուեանի, տիար Կիրակոս Գույումճեանի, Ազգային վարժարանի տնօրէնութեան եւ ուսուցչական կազմին, վարժարանի հոգաբարձութեան ատենապետ տիար Ֆիլիփ Բաթաթանեանին, մրցանակակիր աշակերտուհի Նայիրի Միքայէլեանի եւ անոր ծնողներուն, Ազգային վարժարանի տնօրէն տոքթ. Ներսէս Սարգսեան շնորհաւորեց Նայիրի Միքայէլեանը մրցանակին արժանանալու առիթով, անոր մաղթելով նորանոր յաջողութիւններ: Պարոն տնօրէնը միաժամանակ իր երախտագիտութիւնը յայտնեց տիար Կիրակոս Գույումճեանին՝ հայ ուսանողը խրախուսելու նպատակով գնահատելի նախաձեռնութեան համար:
Նշենք, թէ տիար Կիրակոս Գույումճեանի կողմէ հաստատուած այս մրցանակը ( 1000 քուէյթեան տինար) կը յանձնուի Քուէյթի պաքալորիայի պետական քննութիւններուն բարձրագոյն նիշ ապահոված հայ ուսանողին: Մրցանակի նպատակն է խրախուսել աշակերտութեան մօտ ուսումնատենչութիւնը եւ բարձրագոյն կրթութիւն ստանալու ոգին:
«Ներսէս Շնորհալի» մրցանակը հաստատուած է 2012-2013 կրթական տարեշրջանի սկիզբը:Նոյն թուականին, մրցանակին արժանացած է Յովսէփ Աբգարեանը, 2014-2015 տարեշրջանին՝ Ցոլեր Գալայճեանը, 2015-2016-ին՝ Սերլի Թովմասեանը:
Քուէյթի վարժարանի տնօրէն տիար Ներսէս Սարգսեան միաժամանակ շնորհակալութիւն յայտնեց տիար Կիրակոս Գույումճեանին՝ վարժարանի դասարաններէն մէկուն ամբողջական վերանորոգութիւնը ստանձնելու պատրաստակամութեան համար:
Խօսք առաւ տիար Կիրակոս Գույումճեանը: Ան շնորհաւորեց Նայիրի Միքայէլեանը, մաղթելով յարատեւ վերելք եւ նորանոր նուաճումներ: Տիար Կիրակոս Գույումճեան յոյս յայտնեց, որ սոյն մրցանակը ամենափոքրը դառնայ Նայիրիի ուսումնական ասպարէզին մէջ:
Այս առիթով կը շնորհաւորենք քուէյթահայ ուսանողուհի Նայիրի Միքայէլեանը, շնորհակալութիւն կը յայտնենք Պրն. Կիրակոս Գույումճեանին եւ բոլոր անոնց, որոնք նախանձախնդիր կը մնան հայ ուսանողներու յաջողութեան:
