Քրտամէտ ընդդիմադիր Ժողովուրդներու դեմոկրատական կուսակցութեան (HDP-ԺԴԿ) հայ պատգամաւոր Կարօ Փայլան արձագանգած է Թուրքիոյ ներքին գործոց նախարար Սուլէյման Սոյլուի այն սպառնալիքներուն, որոնք ուղղուած էին իրենց կուսակցութեան եւ համանախագահ Փերուին Պուլտանին:
Սոյլուի սպառնալիքներուն մասին յայտնած էր նոյնինքն Պուլտանը: Այս մասին կը հաղորդէ «Ermenihaber.am»-ը։
Փայլան թուիթըրի իր էջին կատարած է հետեւեալ արձանագրութիւնը.
«Եթէ պետութեան նախարարը իր մաֆիոզ բերանով կը սպառնայ իր մեծութեամբ Թուրքիոյ երրորդ կուսակցութեան, ուստի կրնանք ըսել, որ ասիկա ո՛չ թէ պետութիւն է, այլ մաֆիա»:
Յիշեցնենք, որ Սուլէյման Սոյլուն սպառնացած էր, թէ Թուրքիոյ Աղրը բնակավայրին մէջ քարը քարի վրայ չի ձգեր, ինչպէս եղած է Սուրի, Նուսայպինի եւ Ճիզրէի մէջ քիւրտ զինեալներու դէմ ռազմական գործողութիւններուն ժամանակ։
