Թուրք յայտնի պատմաբան Թաներ Աքչամ Հայոց Ցեղասպանութեան թեմայով հետաքրքրուած է եւ զայն սկսած է ուսումնասիրել շնորհիւ իր հօր: Հայրը անոր մէջ սերմանած է արդարութեան համար պայքարիլը:
Ըստ «Armenpress.am»-ի՝ Աքչամ այդ մասին ըսած է Հայաստանի մէջ «Սպանութեան հրամաններ. Թալէաթ փաշայի հեռագիրները եւ Հայոց Ցեղասպանութիւնը» թեմայով ձեռնարկին ժամանակ:
«Ես թուրք եմ, բայց մենք բոլորս նոյն արիւնը ունինք: Հայոց Ցեղասպանութեան թեմայով հետաքրքրուած եմ հօրս շնորհիւ: Հայրս կ’ըսէր միայն մէկ բան՝ պատմէ ճշմարտութիւնը եւ պայքարիր արդարութեան համար»,- ըսած է թուրք պատմաբանը:
Աքչամ նշած է, թէ երբ կը քալէ Երեւանի մէջ, կը զգայ նոյն օդը, նոյն աշխարհագրութիւնը:
Ան նշած է, թէ Թուրքիոյ մէջ ժխտողականութիւնը կը հիմնաւորեն Հայոց Ցեղասպանութեան մասին փաստող փաստաթուղթերու բնօրինակները պահանջելով: «Բնօրինակ փաստաթուղթի պակասին պատճառով եղելութիւնը կը դնեն կասկածի տակ: Թուրքիոյ կողմէ ժխտողականութիւնը ի սկզբանէ եղած է ցեղասպանութեան անքակտելի մասը»,- ըսած է Աքչամ եւ աւելցուցած, որ ժխտողականութիւնը ի յայտ չէ եկած Հայոց Ցեղասպանութենէն ետք, այլ սերմանուած եղած է ակունքներու մէջ:
Թուրք յայտնի պատմաբան Թաներ Աքչամ կը ճանչնայ Հայոց Ցեղասպանութիւնը: Ան այդ թեմայով աշխատանքներ ունի:
