Հաճընցի ընտանիքի զաւակ Գրիգոր Եալմանեան ծնած է Իսքանտարուն: Իր սերնդակիցներու մեծամասնութեան նման ճաշակած է մանկութեան բոլոր դառնութիւնները: Կեանքի պայմանները զինք մղած են կիսատ ձգելու ուսումը:
Աշխատասէր եւ կամքի տէր երիտասարդ, ինքնաշխատութեան շնորհիւ յաղթահարած է կեանքի ովկիանոսին ալիքները: Ընտանեկան բոյն կազմած է հաճընցի՝ Զաքարեան երեւելի ընտանիքի դուստր՝ Ալիսի հետ: Աստուած նորաստեղծ ընտանիքին պարգեւած է դուստր մը՝ Լիզա եւ երեք մանչ՝ Վարդիվառ, Կարօ, Յովիկ:
Երիտասարդ տարիքէն մուտք գործած է Ռամկավար Ազատական Կուսակցութեան շարքերը եւ շնորհիւ իր յանդուգն նկարագիրին դարձած է կուսակցութեան մարտական թեւի ամենագործունեայ ղեկավարներէն:
Գրիգոր Եալմանեան խառնուածքով եղած է բարեսիրտ եւ մարդասէր հայորդի մը: Լիբանանի քաղաքացիական պատերազմի օրերուն մեծ ծայառութիւն մատուցեց Քարանթինայի շրջանի այլազգ բնակչութեան՝ երաշխաւորելով անոնց ապահով ելքը դէպի Հաճնոյ Սուրբ Գէորգ եկեղեցի, ապա դէպի արեւմտեան Պէյրութ:
Այս միջոցին շատ անգամ վտանգեց իր կեանքը: Քանի մը անգամ առեւանգուեցաւ: Առիթով մը հրաշքով փրկուեցաւ մահէն, երբ անարգ ոճիրի ենթարկուելէ քանի մը վայրկեան առաջ, Քարանթինայէն վերապրող մը միջնորդեց՝ փրկելով անոր կեանքը:
Քարանթինայի աղէտէն բազմաթիւ վերապրողներ մինչեւ օրս կը յիշատակեն Գրիգոր Եալմանեանի մարդասիրական այս անգնահատելի ծառայութիւնները: Տկարին ընկերն էր ան եւ կը հաւատար մարդ արարածի ազատ ապրելու իրաւունքին՝ մերժելով համայնքային պատկանելիութեան պատրուակի տակ կատարուող վայրագութիւնները:
Երկար ժամանակ ան դարձաւ ՌԱԿ-ի Եկարեան ակումբի մարտական պատասխանատուն, աւելի ուշ՝ Կուսակցութեան Անթիլիասի շրջանի եւ ակումբի պատասխանատուն:
Գրիգոր Եալմանեան միաժամանակ կ’ապրէր Մայր հայրենիքով: Հայրենիքի վերելքով եւ սէրով կը դաստիարակէր իր զաւակները, շրջապատը: Ընկերասէր էր եւ կը վայելէր շրջապատին յարգանքը:
Գթասիրտ էր եւ կարեկցող: Բարեգործութիւնը անոր համար ծայառութիւն էր, խղճի հանգստութիւն: Քանի-քանի ուսանողներու կրթաթոշակը կը փակէր, միշտ լռութեան մէջ՝ առանց յայտարարութիւններու կամ շռնթալից գնահատականներու ակնկալութեան: Այսպէս դաստիարակեց նաեւ իր զաւակները՝ ազգին, շրջապատին ծառայել լռութեամբ:
Այսօր այսպիսի արժանաւոր հայորդի մը հրաժեշտ կու տայ մեզի, սակայն անոր անունը, բարի գործերը վառ պիտի մնան իր տիկնոջ, զաւակներուն, հարսերուն, թոռնիկներուն, գաղափարի ընկերներուն եւ բարեկամներուն սրտերուն մէջ:
Յիշատակը անմար:
Սգակիր Ընկեր Մը
