*ՎԼԱՏԻՄԻՐ ՊՕՂՈՍԵԱՆ*
«ԶԱՐԹՕՆՔ» – Յունիս 13-ին Լիբանանի մէջ ՀՀ դեսպանութեան եւ Պէյրութի Հայկազեան համալսարանի հովանիին ներքոյ համալսարանի «Մաթոսեան» սրահին մէջ տեղի ունեցաւ ՀՀ ժողովրդական նկարիչ Անաթոլի Աւետեանի աշխատանքներու ցուցահանդէսի բացումը:
Ողջոյնի խօսքով հանդէս եկան Պէյրութի Հայկազեան համալսարանի նախագահ վերապատուելի Դոկտ. Փոլ Հայտոսթեան եւ Լիբանանի մէջ ՀՀ դեսպան Սամուէլ Մկրտչեան: Դեսպանը իր խօսքին մէջ բարձր գնահատեց Ա. Աւետեանի ստեղծագործական ինքնատպութիւնը, բազմազան արտայայտչամիջոցներու համակցման վարպետութիւնը:
Ան արուեստագէտին մաղթեց արդէն իսկ տասնամեակներու բեղուն ստեղծագործական աշխատանքի շարունակութիւն: Պրն. Դեսպանը նաեւ երախտագիտութիւն յայտնեց վերապատուելի Դոկտ. Հայտոսթեանին Հայկազեան համալսարանի կողմէ մշտապէս ցուցաբերուող աջակցութեան համար:
Աւետեան արուեստագէտը շնորհակալութիւն յայտնեց ցուցահանդէսի կազմակերպիչներուն եւ իր արուեստին ուղղուած գնահատանքի խօսքերուն համար:
Նշենք, որ ցուցահանդէսին ներկայացուած էին թիւով 26 ստեղծագործութիւններ: Ցուցահանդէսը արուեստասէր հանրութեան համար բաց մնաց մինչեւ 16 Յունիս:
