Ազրպէյճանի հրթիռային զօրքերու նորաբաց զօրամասին մէջ, ուր այցելած է նախագահ Իլհամ Ալիեւ, ցուցադրուած են «Փոլոնեզ» համազարկային կրակի հակազդեցիկ հրթիռային համակարգերը եւ Իսրայէլի արտադրութեան LORA մարտավարական հրթիռային համալիրները` կոշտ վառելիքով գործող ձգաբանական հրթիռով, որոնք կ’երեւին զօրամասի բացման լուսանկարներուն մէջ։
Լուսանկարներուն մէջ կ’երեւի, թէ ի՛նչպէս Ալիեւ այդ երկրի ՊՆ ղեկավար Զաքիր Հասանովի ուղեկցութեամբ կ’անցնի «Փոլոնեզ»-ներու մօտէն: Մէկ այլ լուսանկարի մէջ կ’երեւին իսրայէլեան համալիրները:
Աւելի առաջ յայտնի դարձաւ, որ 2018-ին Պելառուսիան մտադիր է կատարել «Փոլոնեզ» համազարկային կրակի հակազդեցիկ համակարգերու արտահանման առաջին պայմանագիրը: Պիտի արտահանուի 10 այդպիսի համակարգ, որոնց հաւանական պատուիրատուն Ազրպէյճանն է: Այդ մասին կը գրէ ռուսական «Քոմերսանթ»-ը` աւելցնելով, որ այդ պայմանագիրը բացասաբար պիտի ընդունուի Հայաստանի մէջ, սակայն այնտեղ եղած «Իսկանտերներ»-ը պէտք է զսպող դերակատարութիւն ունենան: «Քոմերսանթ»-ի ռազմական դիւանագիտական աղբիւրը կը կարծէ, թէ պատրաստուող պայմանագիրը կրնայ դիտարկուիլ որպէս «Ազրպէյճանի ուշացած պատասխանը Ռուսիոյ կողմէ Հայաստանին «Իսկանտերներ»-ու մատակարարման:
