Արցախեան իրադարձութիւններուն մասին ՀՀ նախագահ Արմէն Սարգսեանի տեսակէտը ճշդելու նպատակով «168.am»-ը հարցում ուղղած է ՀՀ նախագահի աշխատակազմի հասարակայնութեան հետ կապերու վարչութեան:
-Ի՞նչպէս կը գնահատէ ՀՀ նախագահ Արմէն Սարգսեան Ստեփանակերտի մէջ ծայր առած բողոքի գործողութիւնները:
-Հանրապետութեան նախագահը կ’ողջունէ Արցախի նախագահ Բակօ Սահակեանի հետ ձեռք բերուած պայմանաւորուածութիւններու եւ Հայաստանի վարչապետի յորդորին հիման վրայ Ստեփանակերտի մէջ բողոքի գործողութիւններու դադրեցումը: Նախագահ Սարգսեան ամէնօրեայ կապի մէջ է Արցախի նախագահին հետ, ստեղծուած իրավիճակին շուրջ կը խորհրդակցի նաեւ Արցախի նախկին ղեկավարութեան եւ հեղինակաւոր մարդոց հետ:
Նախագահը գոհունակութիւն կը յայտնէ, որ Արցախի իշխանութիւնները արագ արձագանգեցին ցաւալի միջադէպին, որ դատապարտուեցաւ, որակուեցաւ անթոյլատրելի եւ իրաւական գնահատական ստացաւ: Արցախի Ազգային ժողովին մէջ ստեղծուեցաւ քննիչ յանձնաժողով իրադրութեան մասին համապարփակ քննարկումներու հարցերով:
Միջադէպին շուրջ ծաւալուած զարգացումները ցոյց կու տան, որ Արցախի ժողովուրդը կը ցուցաբերէ քաղաքական եւ քաղաքացիական բարձր գիտակցութիւն:
Նախագահը կը կիսէ այն գնահատականը, որ Արցախի համար բացառիկ արժէքներ են ներքին կայունութիւնը, պետական հիմքերու անսասանութիւնը, երկրի անվտանգութեան եւ պաշտպանողունակութեան հետեւողական բարձրացումը, որուն կարելի է հասնիլ Արցախի բնակիչներու աշխատանքի եւ կեանքի խաղաղ պայմաններու ապահովման եւ կենսապայմաններու բարելաւման նպատակով ընկերա-տնտեսական հարցերու լուծման միջոցով:
