Հինգշաբթի, 25. 07. 2024

spot_img

Մայր Աթոռ Սուրբ Էջմիածնում սկսուեց Գերագոյն հոգեւոր խորհրդի ժողովը

Մայիսի 29-ին Մայր Աթոռ Սուրբ Էջմիածնում, նախագահութեամբ Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի,  սկսուեց Գերագոյն հոգեւոր խորհրդի ժողովը:

Քառօրեայ ժողովը բացուեց Ամենայն Հայոց Կաթողիկոսի օրհնութեան խօսքով։ Ողջունելով Հայ Եկեղեցու աշխարհասփիւռ տարբեր թեմերից Մայր Աթոռ ժամանած ԳՀԽ հոգեւորական եւ աշխարհական անդամներին՝ Նորին Սրբութիւնը նուիրեալ ծառայութեան համար իր գնահատանքը փոխանցեց նրանց։ 

Վեհափառ Հայրապետը շնորհաւորեց ներկաներին Հայաստանի առաջին Հանրապետութեան եւ մայիսեան հերոսամարտերի 100-ամեայ յոբելեանի առիթով՝ ուրախութիւն յայտնելով, որ ԳՀԽ անդամները հնարաւորութիւն ունեցան մասնակցելու 100-ամեակի ծիրից ներս կազմակերպուած տօնական միջոցառումներին։ Նորին Սրբութիւնը տեղեկացրեց, որ առաջիկայ օրերին Գերագոյն հոգեւոր խորհրդի անդամները կ’այցելեն Ծիծեռնակաբերդի եւ Սարդարապատի յուշահամալիրներ՝ յարգանքի տուրք մատուցելու եւ իրենց աղօթքը բարձրացնելու հայրենիքի պաշտպանութեան եւ հաւատքի համար նահատակուած հայորդիների համար։

Ժողովին մաղթելով արդիւնաւոր աշխատանք` Գարեգին Բ Կաթողիկոսն արձանագրեց, որ նիստերի օրակարգում ընդգրկուած են ազգային, եկեղեցական կեանքին առնչուած կարեւոր հարցեր։

Մասնաւորաբար քննարկուելու են Գերագոյն հոգեւոր խորհրդի կանոնադրութեանը, Եկեղեցական-ներկայացուցչական ժողովի յանձնախմբերի կանոնակարգերին,  տարբեր թեմերի կանոնադրութիւններին, ինչպէս նաեւ 2018 թ. Երիտասարդութեան տարուայ շրջանակներում ծրագրուող միջոցառումներին վերաբերող նիւթեր եւ այլ հարցեր։ Քննարկման առարկայ կը դառնայ նաեւ Մայր Տաճարի ամրակայման եւ հիմնանորոգութեան ընթացքը։

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին