Նախագահ Արմէն Սարգսեան երէկ ընդունած է Հարաւային Կովկասի մէջ եւ Վրաստանի ճգնաժամի հարցերով ԵՄ յատուկ ներկայացուցիչ Թոյվօ Քլաարը: Ինչպէս կը փոխանցէ «Արմէնփրես»-ը, այս մասին կը տեղեկացնեն ՀՀ նախագահի գրասենեակէն:
Նախագահ Սարգսեան կարեւորած է Եւրոպական Միութեան հետ յարաբերութիւններու շարունակական զարգացումն ու կառուցողական երկխօսութիւնը: Ան ըսած է, որ համապարփակ եւ ընդլայնուած գործընկերութեան համաձայնագիրը փոխգործակցութեան նոր հնարաւորութիւններ կը բանայ:
Զրուցակիցները միտքեր փոխանակած են ղարաբաղեան հիմնախնդիրի կարգաւորման ընթացքին վերաբերեալ: Երկրի ղեկավարը ըսած է, որ Հայաստանը հաւատարիմ է ԵԱՀԿ Մինսքի խումբի համանախագահներուն միջնորդութեամբ իրականացուող բանակցային գործընթացին եւ յանձնառու է շարունակելու զայն՝ հիմնախնդիրի խաղաղ կարգաւորման հասնելու համար: Կողմերը խօսած են նաեւ խաղաղութեան նպաստող մթնոլորտի ձեւաւորման անհրաժեշտութեան մասին եւ կարեւորած քաղաքացիական հասարակութիւններու ներգրաւումը փոխվստահութեան ձեւաւորման ուղղուած միջոցառումներուն մէջ:
