ՀՀ ելեւմտական նախարար Ատոմ Ջանջուղազեան Մայիս 22-ին ընդունած է Հայաստանի Հանրապետութեան մէջ Գերմանիոյ Դաշնային Հանրապետութեան արտակարգ եւ լիազօր դեսպան Րերնարտ Մաթիաս Քիսլերը: Այս մասին կը տեղեկացնեն ՀՀ ելեւմտական նախարարութեան տեղեկատուութեան եւ հասարակայնութեան հետ կապերու բաժինէն:
Դեսպան Քիսլեր շնորհաւորած է Ատոմ Ջանջուղազեանը ՀՀ ելեւմտական նախարարի պաշտօնը ստանձնելու առիթով: Ներկայացնելով գերմանական կողմի դիրքորոշումը` ան յայտնած է, որ դաշնային կառավարութիւնը պատրաստ է ո՛չ միայն պահպանելու առկայ տնտեսական կապերը, այլ նաեւ քայլեր ձեռնարկելու համագործակցութեան հետագայ զարգացման ուղղութեամբ:
Ատոմ Ջանջուղազեան յայտնած է, որ ՀՀ ելեւմտական նախարարութիւնը մտադիր է շարունակել օրակարգի վրայ առկայ բոլոր ծրագիրները իրականացումը: Նախարար Ջանջուղազեան ընդգծած է պետական ծախսերու արդիւնաւէտ կառավարման կարեւորութիւնը եւ նշած, որ այս հարցով մեծ ներդրում ունին գործընկեր-պետութիւններն ու միջազգային ելեւմտական կառոյցները ե՛ւ նիւթական աջակցութեան, ե՛ւ մշակոյթի ու փորձի փոխանակման տեսանկիւնէն:
Հանդիպման ընթացքին քննարկուած է ելեւմտական եւ ճարտարագիտական հարցերով հայ-գերմանական միջկառավարական յանձնաժողովի հերթական նիստը ընթացիկ տարուան երկրորդ կիսամեակին իրականացնելու հնարաւորութիւնը: Կողմերը անդրադարձած են նաեւ ընթացիկ համագործակցութեան այլ հարցերու եւ կարեւոր համարած համագործակցութեան ընդլայնման հեռանկարները:
