Ռամկավար Ազատական Կուսակցութեան Արժանթինի օրկան «Սարտարապատ» շաբաթաթերթի կազմակերպութեամբ խումբ մը արժանթինահայեր այցելեցին Արցախի մէջ զանազան վայրեր: Խումբը անձամբ կը գլխաւորէր ՌԱԿ Կեդրոնական Վարչութեան ատենապետ՝ ընկ. Սերխիօ Նահապետեան: Խումբին մաս կը կազմէին նաեւ Պուէնոս Այրէսի Սուրբ Գրիգոր Լուսաւորիչ եկեղեցւոյ հոգեւոր հովիւ Տէր Մաղաքիա վարդապետ Ամիրեանը, տեղւոյն ՀԲԸՄ-ի վարչութեան անդամներ՝ Սուսաննա Նահապետեանը եւ Խուան Քարլոս Մուրատեանը, «Սարտարապատ» շաբաթաթերթի գլխաւոր խմբագիր՝ Տիանա Տէր Կարապետեանը եւ շատ ուրիշներ:
Արցախի զանազան տեսարժան վայրեր ու կեդրոններ այցելութեան ծիրէն ներս խումբը ընդունուեցաւ ԱՀ կրթութեան, գիտութեան եւ սփորի նախարար Նարինէ Էդուարդի Աղաբալեանի կողմէ: Փոխադարձ մտերմիկ մթնոլորտի մէջ Արժանթինահայ հիւրերը յարգելի տիկին նախարարին հետ քննարկեցին Արցախն ու Հայ ժողովուրդը յուզող հարցեր միշտ տուեալ նախարարութեան պատասխանատուութեան ու գործելադաշտին ընդմէջէն:
Ընկ. Սերխիօ Նահապետեան շեշտը դրաւ երկուստէք համագործակցութեան վրայ նամանաւանդ կրթութեան ծիրէն ներս: Ան գործնական աշխատանքային ծրագրով մը հանդէս եկաւ առաջարկելով խումբ մը որոշ չափանիշերով ընտրեալ Արցախցի աշակերտներ հիւրընկալել Արժանթինի մէջ, անաոնց աշխարհահայեացքը աւելի եւս լայնցնելու եւ փորձառութիւն ձեռք բերելու համար:
