Մայիս 16-ին,2017-ի պետական պիւտճէի կատարման հաշուետուութեան քննարկումներուն ընթացքին, Արցախի պետական նախարար Արայիկ Յարութիւնեան յայտնեց, որ 2016-էն ի վեր Արցախի Հանրապետութեան կառավարութեան կողմէ քննարկուող Ստեփանակերտ-Շուշի ճոպանուղիի կառուցման ծրագիրի նախագծային աշխատանքը իր աւարտին հասած է:
«Համոզուած եմ, որ այդ ծրագիրը կեանքի պիտի կոչուի: Ստեփանակերտ-Շուշի ճոպանուղին պիտի հանդիսանայ ոչ միայն որպէս փոխադրամիջոց, այլ զբօսաշրջութեան խթանման համար լուրջ գործօն»,- յայտնեց Յարութիւնեան նախագիծը Ազգային ժողովին ներկայացնելու ընթացքին եւ նշեց, որ ճոպանուղիի կառուցման զուգահեռ, Շուշիի մէջ կը նախատեսուի ունենալ նաեւ հանգիստի գօտի:
