Հայաստանի Հանրապետութեան կառավարութեան առաջին նիստը նորընտիր վարչապետ Նիկոլ Փաշինեանի ղեկավարութեամբ կը կայանայ Մայիս 11-ին: Ինչպէս կը հաղորդէ «Արմէնփրես»-ը, այս մասին կը տեղեկացնեն ՀՀ կառավարութեան տեղեկատուութեան եւ հասարակայնութեան հետ կապերու վարչութենէն:
«ՀՀ կառավարութեան հերթական նիստը տեղի կ’ունենայ Մայիս 11-ին՝ ժամը 11:00-ին»,- կ’ըսուի կառավարութեան յայտարարութեան մէջ:
Հայաստանի Հանրապետութեան Ազգային ժողովի Մայիս 8-ի յատուկ նիստին կայացած անուանական, բաց քուէարկութեամբ «Ելք» խմբակցութեան ղեկավար Նիկոլ Փաշինեանը ընտրուեցաւ ՀՀ վարչապետ: Փաշինեանի օգտին կողմ քուէարկեց 59, դէմ՝ 42 պատգամաւոր:
Համաձայն ՀՀ սահմանադրութեան՝ կառավարութիւնը կը կազմաւորուի վարչապետ նշանակուելէ ետք՝ տասնհինգօրեայ ժամկէտի մէջ: Իր նշանակումէն ետք վարչապետը հնգօրեայ ժամկէտի մէջ Հանրապետութեան նախագահին կ’առաջարկէ փոխվարչապետներու եւ նախարարներու թեկնածուները: Կառավարութեան կազմաւորումէն ետք քսանօրեայ ժամկէտի մէջ վարչապետը Ազգային ժողով կը ներկայացնէ կառավարութեան ծրագիրը:
ԱԺ-ն կառավարութեան ծրագիրին հաւանութիւն կու տայ եօթնօրեայ ժամկէտի մէջ` պատգամաւորներու ընդհանուր թիւի ձայներու մեծամասնութեամբ: Եթէ ԱԺ-ն հաւանութիւն չտայ կառավարութեան ծրագիրին եւ չընտրէ նոր վարչապետ, ապա ԱԺ-ն կ’արձակուի իրաւունքի ուժով: Եթե Ազգային ժողովը ընտրէ վարչապետին, սակայն դարձեալ հաւանութիւն չտայ կառավարութեան ծրագիրին, ապա Ազգային ժողովը կ’արձակուի իրաւունքի ուժով:
