Հայաստանը Մայիս 8-ին կ’ունենայ վարչապետ: ՀՀԿ-ն պիտի սատարէ Խորհրդարանի 1/3 կողմէ առաջադրուած թեկնածուին, իսկ Հանրապետականը սեփական թեկնածու պիտի չառաջադրէ: «Արմէնփրես»-ի փոխանցումով՝ այս մասին յայտարարեց ՀՀԿ խմբակցութեան ղեկավար Վահրամ Պաղտասարեանը:
Նշենք, որ այս յայտարարութիւնը նախորդած է ՀՀԿ Խմբակցութեան նիստ մը: Ազգային Ժողովի ՀՀԿ խմբակցութեան նիստին մասնակցած է կուսակցութեան առաջնորդ, ՀՀ երրորդ նախագահ Սերժ Սարգսեանը: «Արմէնփրես»-ի հաղորդումով` Ազգային Ժողովի ՀՀԿ խմբակցութեան պատգամաւոր Արմէն Աշոտեանը լրագրողներուն յայտնած է, որ նիստի աշխատանքներու աւարտէն ետք լրագրողներուն պէտք եղած տեղեկութիւնները պիտի փոխանցուին:
Նիստի ընթացքին պատգամաւորները քննարկած են ստեղծուած ներքաղաքական վիճակէն դուրս գալու ուղիները:
«Ելք» խմբակցութեան ղեկավար Նիկոլ Փաշինեանը Մայիս 1-ին խորհրդարանին մէջ կայացած յատուկ նիստին վարչապետ չընտրուելէ ետք, համապետական դասադուլի եւ գործադուլի կոչ ըրաւ քաղաքացիներուն: Մայիս 2-ի առաւօտեան Հանրապետութեան ճամբաները փակ էին՝ ներառեալ միջմարզային, ներհամայնքային եւ այլք: Փակ էր նաեւ դէպի «Զուարթնոց» օդակայան տանող ճամբան:
