Ազգային ժողովի «Ելք» խմբակցութիւնը կողմնորոշուած է վարչապետի իր թեկնածուի հարցի տեսակէտէն. կ’առաջադրեն Նիկոլ Փաշինեանին, սակայն ընտրուելու համար անհրաժեշտ նուազագոյն ձայներու հարցը անորոշ է:
Խմբակցութեան անդամ, «Լուսաւոր Հայաստան» կուսակցութեան ղեկավար Էտմոն Մարուքեանի կարծիքով՝ եթէ Փաշինեանի թեկնածութեան կողմ քուէարկեն «Ելք»-ի (9) եւ «Բարգաւաճ Հայաստան»-ի (31) բոլոր պատգամաւորները, ապա կ’ըլլայ 40 ձայն: Ընտրուելու համար անհրաժեշտ է 53 ձայն:
Սակայն մնացած 13 ձայնի հարցը անորոշ է: «Արմէնփրես»-ի հաղորդմամբ՝ «Բարգաւաճ Հայաստան» կուսակցութիւնը արդէն յայտարարած է իր զօրակցութիւնը Նիկոլ Փաշինեանին: Արտախորհրդարանական «Ժառանգութիւն», «Օրինաց երկիր» կուսակցութիւնները եւս յայտարարած են իրենց աջակցութիւնը:
Ազգային ժողովի ՀՅԴ խմբակցութեան պատգամաւորներ՝ Անդրանիկ Կարապետեանը եւ Սուրէն Մանուկեանը ընկերային ցանցի իրենց էջերուն գրառում կատարած են` յայտարարելով, որ ամբողջապէս կը սատարեն Նիկոլ Փաշինեանին:
