Թրքական լրատուական կայքերը, յատկապէս իշխանական, (TRThaber.com, sabah.com.tr, haberturk.com, aksam.com.tr) աշխուժօրէն տարածուած են հայ-թրքական սահմանի Կարսի հատուածին տեղակայուած Մուսթաֆա Քոչաք սահմանային զօրամասի վերաբերեալ պատրաստուած հրապարակումը: Ըստ «Ermenihaber.am»-ի՝ թրքական «Ihlas» լրատուական գործակալութեան կողմէ պատրաստուած հրապարակումը, որուն կցուած է նաեւ տեսանիւթ, կ’անդրադառնայ հայ-թրքական սահմանի` Կարսին յարակից հատուածին վրայ իրականացուող հերթապահութեան: Հրապարակումին մէջ կը տեղեկացուի, որ հայ-թրքական սահմանը կը հսկուի սովորական ու ջերմային տեսախցիկներով, ինչպէս նաեւ զինուորները կ’օգտագործեն գիշերային տեսանելիութեան սարքեր:
«Աշտարակներու վրայ հերթապահութիւն իրականացնող զինուորներն ալ մատները զէնքի ձգանին պահած կը հետեւին, որպէսզի անհրաժեշտ պահի միջամտեն սահմանը խախտելու դէպքերը»,- գրած է Թուրքիոյ հեռուստառատիոընկերութեան լրատուական կայքը (TRThaber.com):
Հրապարակման մէջ կը խօսուի նաեւ լրատուական գործակալութեան զօրամաս կատարած այցին օրը տեղի ունեցած սահմանային միջադէպին մասին, որուն ժամանակ «սահմանապահ զինուորները ակնթարթային միջամտութիւն ցուցաբերած են»: Սահմանախախտը եղած է Կարսի շրջանի գիւղերէն մէկուն բնակիչը, որ անյայտ պատճառներով յայտնուած է սահմանային արգիլուած գօտիին մէջ:
«24 ժամ տեսախցիկներով սահմանը վերահսկող զինուորները անմիջապէս նկատած են գիւղացին ու արագ մեկնելով սահմանային տուեալ հատուած, տեղափոխած են վերջինը այլ տեղ»,- կը գրէ պետական լրատուամիջոցը` աւելցնելով, որ անկէ ետք սահմանապահ զինուորները մանրակրկիտ ստուգած են սահմանի մօտ 10 քիլոմեթրնոց հատուածն ու վերադարձած զօրանոց:
