Աշխատանքային այցով Պրիւքսէլ գտնուող Արցախի Հանրապետութեան ԱԳ նախարարի տեղակալ Արմինէ Ալեքսանեան Փետրուար 26-ին եւ 27-ին մասնակցած է Եւրոպական քաղաքականութեան հետազօտութիւններու կեդրոնին (CEPS) մէջ կայացած փակ քննարկման, որ նուիրուած էր ազրպէյճանա-ղարաբաղեան հակամարտութեան կարգաւորման իրաւական երեւոյթներուն: Այս մասին նշուած է Արցախի Հանրապետութեան Արտաքին գործոց նախարարութեան երէկ տարածած յայտարարութեան մէջ:
Քննարկման մասնակցած են միջազգային իրաւունքի առաջատար մասնագէտներ, քաղաքական վերլուծաբաններ, դիւանագէտներ:
Քննարկման արդիւնքները ամփոփուած են Փետրուար 27-ին Եւրոպական խորհրդարանին մէջ կազմակերպուած կլոր սեղանին ժամանակ, որուն ընթացքին Արմինէ Ալեքսանեան ներկայացուցած է Արցախի դիրքորոշումը` հակամարտութեան խաղաղ կարգաւորման առնչուող շարք մը հարցերու շուրջ: Քննարկման մասնակցած են Եւրոպական խորհրդարանի պատգամաւորներ, ԵՄ այլ կառոյցներու ներկայացուցիչներ, ՀՀ դիւանագէտներ, գիտահետազօտական կեդրոններու փորձագէտներ:
Ելոյթով հանդէս եկած է նաեւ Արցախի արտաքին քաղաքականութեան եւ անվտանգութեան հանրային խորհուրդի աւագ վերլուծաբան Արտակ Բեգլարեան:
Քննարկումները կազմակերպուած էին Արդարադատութեան եւ մարդու իրաւունքներու հայկական կեդրոնի եւ Թուֆենկեան հիմնադրամի համատեղ ջանքերով` Եւրոպայի Հայ Դատի գրասենեակին աջակցութեամբ:
