Յառաջիկայ Երկուշաբթի 5 Փետրուար 2018-ի երեկոյեան, Պէյրութի Թէքէեան Կեդրոնի սրահին մէջ տեղի պիտի ունենայ «Զարթօնք» օրաթերթի 80-ամեակի Եզրափակիչ Հանդիսութիւն:
Ձեռնարկը կը հովանաւորէ Լիբանանի Տեղակատուութեան Նախարարութիւնը, որ այս առթիւ յատուկ գնահատանքի գիր յղած է 80-ամեայ հսկային:
Մեծի Տանն Կիլիկիոյ Կաթողիկոս Արամ Ա. Վեհափառի, ինչպէս նաեւ Տանն Կիլիկիոյ Կաթողիկէ Հայոց Կաթողիկոս-Պատրիարքին եւ ՄԱՀԱԵՄ-թեան Նախագահին օրհնութեան եւ ողջոյնի գիրերու ընթերցումներէն ետք, բացման խօսքով հանդէս պիտի գայ, «Զարթօնք»ի երկարամեայ աշխատակից՝ Ճենի Գրիգորեան-Բարսեղեան:
Ձեռնարկը պիտի ունենայ երեք հանգամանաւոր զեկուցաբերներ: Հայկազեան Համալսարանի «Սփիւռքի Ուսումնասիրութեան Կեդրոն»-ի տնօրէն՝ Դոկտ. Անդրանիկ Տագէսեան հանդէս պիտի գայ. «Սփիւռքահայ Մամուլը. Լինե՞լ, թէ Չլինել» նիւթով: Հայրենիքէն յատուկ հրաւիրուած, Երեւանի Պետական Մանկավարժական Համալսարանի «Սփիւռք Կեդրոնի» տնօրէն՝ Դոկտ. Սուրէն Դանիէլեան պիտի խօսի «Պատառիկներ «Զարթօնք»ի Գրական Միտքի Քննական Դեգերումներ»ու մասին: Դարձեալ Հայրենիքէն հիւրաբար ժամանած, «Զարթօնք»ի գործընկեր «Արմենփրէս» Գործակալութեան տնօրէն՝ Դոկտ. Արամ Անանեան պիտի զեկուցէ «Զարթօնքը համահայկական լրատուութեան համապատկերին մէջ. Մտորումներ ապագայի Լրատուութեան Մասին» նիւթով:
Ձեռնարկի ընթացքին վիտէօերիզով պիտի ցուցադրուին կարգ մը վկայութիւններ »Զարթօնք»ի մասի եւ պատառիկներ Երեւանի մէջ Հայաստանի Ազգային Գրադարանին մէջ կայացած «Զարթօնք»ի 80ամեակի նշումէն:
Պիտի ըլլան գեղարուեստական ընդմիջումներ, ջութակի եւ դաշանամուրի նուագածութեամբ:
Շնորհակալական խօսքով հանդէս պիտի գայ »Զարթօնք»ի գլխաւոր խմբագիր՝ Սեւակ Յակոբեան:
Պիտի ներկայացուի այս առիթով լոյս տեսած «Զարթօնք»ի յատուկ հրատարակութիւնը:
Փակման խօսքով հանդէս պիտի գայ ԹՄՄ Հիմնադիրներու Մարմնի ատենապետ՝ Յակոբ Գասարճեան:
Աւարտին, տեղի պիտի ունենայ պատշաճ հիւրասիրութիւն:
