Թուրք մտաւորական Պասքըն Օրան համոզուած է` Հրանդ Տինքը լռեցուցին, քանի որ միակ մարդն էր, որ կրնար հաշտեցնել հայերն ու թուրքերը: Այս մասին Տինքի մահուան 11-րդ տարելիցին թուրք մտաւորականը ըսած է «Արմենփրէս»-ին:
Թէեւ Տինքի սպանութենէն անցած է աւելի քան 10 տարի, սակայն սպանութեան իրական մեղաւորները դեռ չեն պատժուած: Հարցումին, թէ արդեօք կարելի՛ է ակնկալել, որ թրքական դատական համակարգը ի վերջոյ գտնէ պոլսահայ մտաւորականին սպանութեան իրական կազմակերպիչները` Օրան ըսած է. «Մեր օրերուն Թուրքիայէն կարելի չէ արդարութիւն ակնկալել որեւէ հարցով: Գործադիր իշխանութիւնները գերի վերցուցած են դատական համակարգը: Դատարանները այլեւս չեն լսեր Սահմանադրական դատարանի որոշումները: Սակայն Հրանդի իրական մարդասպանները անշուշտ օր մը պիտի յայտնաբերուին եւ պատժուին»:
Այն հարցումի, թէ ի՛նչ կ’ըսէր Հրանդին, եթէ հնարաւորութիւն ունենար այսօր տեսնելու զինք, թուրք մտաւորականը ըսած է. «Ներկայ ժամանակներուն փողոց դուրս մի գար: Խելագարուած են, կրնան սպաննել»:
