Յառաջիկային Շուշիի շրջանի Քարին տակ համայնքին մէջ բնակելի տուները ջրատաքացման նպատակով պիտի մեկնարկէ արեւային մարտկոցներով կահաւորելու փորձնական ծրագիրը:
Ըստ «Արցախփրէս»-ի՝ այս մասին Յունուար 17-ին կայացած մամուլի ասուլիսի ժամանակ, խօսելով Արցախի մէջ վերականգնուող, մասնաւորապէս արեւային ուժանիւթի զարգացման մասին, ըսած է ԱՀ պետական նախարար Արայիկ Յարութիւնեան:
«Բացի Շուշիի շրջանէն, համանման ծրագիր պիտի իրականացուի նաեւ Ասկերանի շրջանին մէջ, ուր հանրային նշանակութեան շինութիւնները պիտի անցնին վերականգնուող ուժանիւթի սպառումին: Ինչպէս գիտէք, այս ծրագիրները պիտի իրականացուին նախորդ տարուան հեռուստամարաթոնի ժամանակ «Հայաստան» համահայկական հիմնադրամի հաւաքագրած միջոցներով»,- նշած է Յարութիւնեան:
Պետական նախարարին տեղեկացմամբ` նախատեսուած է նաեւ Ասկերանի շրջանի Իւանեան բնակավայրին մէջ 1 Մեկուաթ հզօրութեամբ արեւային ելեկտրակայանի կառուցում, որ պիտի կառուցուի օտարերկրեայ ներդրումային միջոցներով:
Ա. Յարութիւնեան աւելցուցած է, որ կառավարութիւնը տրամադիր է՝ հանրապետութեան մէջ կայացած եւ բարձր արդիւնաւէտութիւն ունեցող ջրային ուժանիւթի զուգահեռ խթանելու նաեւ արեւային ուժանիւթի հեռանկարային ուղղութեան աստիճանական զարգացումը:
