Հայաստանի Հանրապետութեան պաշտպանութեան նախարար Վիգէն Սարգսեան ընդունած է Հայաստանի մէջ Միացեալ Նահանգներու արտակարգ եւ լիազօր դեսպան Ռիչըրտ Միլզը:
Հանդիպման ընթացքին ամփոփուած են պաշտպանութեան մարզի հայ-ամերիկեան երկկողմանի համագործակցութեան շրջագիծին մէջ 2017-ի ընթացքին կատարուած աշխատանքները եւ նախանշուած են 2018-ի համագործակցութեան հիմնական ուղղութիւնները:
ՀՀ պաշտպանութեան նախարարը համառօտ ներկայացուցած է այն ուղղութիւնները, որոնք պիտի ընդգրկուին զինուած ուժերու արդիականացման 7-ամեայ ծրագիրին մէջ եւ որոնց շուրջ կ’ակնկալուի զարգացնել համագործակցութիւնը Միացեալ Նահանգներուն հետ:
Դեսպան Ռիչըրտ Միլզ, իր կարգին, ընդգծած է փոխադարձ հետաքրքրութիւն ներկայացնող մարզերու մէջ Հայաստանի պաշտպանութեան նախարարութեան հետ համագործակցութիւնը շարունակելու Միացեալ Նահանգներու պաշտպանութեան նախարարութեան պատրաստակամութիւնը: Կողմերը համաձայնութեան եկած են 2018-ին Երեւանի մէջ հայ-ամերիկեան երկկողմանի պաշտպանական խորհրդակցութիւններու կազմակերպման խնդրով, որուն ընթացքին պիտի պայմանաւորուի յետագայ համագործակցութեան ընդհանուր տեսլականը:
Հանդիպման ընթացքին քննարկուած են նաեւ շրջանային անվտանգութեան առնչուող հարցեր:
