*ԼՈՒՍԻՆԷ ՂԱՐԻԲԵԱՆ*
«Դալան» ցուցասրահին մէջ Դեկտեմբեր 12-ին բացուեցաւ «12 պատմութիւն» ցուցահանդէսը: Անիկա կը ներկայացնէ Հայաստան ապրող 12 սուրիահայ կանանց կեանքի պատմութիւնը` ուղեկցուած բռնութիւններով ու սարսափներով:
Այդ պատմութիւնները թէեւ մոռցուած չեն, բայց սուրիահայ կանայք կ’աշխատին չյիշել ու չխօսիլ ատոնց մասին: Ու այդ պատճառով բազմաթիւ կիներէն միայն 12-ը համաձայնած են երիտասարդ նկարիչներու հետ կիսուիլ իրենց պատմութիւններով:
«Սուրիահայ կանայք շատ խնդիրներ ունին` տնտեսական, համարկումի, եւ անոնց մէջ բռնութեան խնդիրը կ’անտեսուի: Անոնք հիմնականօրէն ֆիզիկական բռնութեան դէպքեր են, որոնք պատահած են պատերազմական իրավիճակներու մէջ` Սուրիոյ մէջ, Սուրիայէն Հայաստան կամ մէկ այլ երկիր մեկնելու ճանապարհին»,-կ’ըսուի «World Vision» Հայաստան կազմակերպութեան երիտասարդական ծրագիրներու ղեկավար Լիաննա Սարգսեան:
Հայաստանի մէջ Միացեակ Նահանգներու դեսպանատունը, «World Vision» եւ «Առաքելութիւն Հայաստան» կազմակերպութիւնները յոյս ունին, որ համատեղ ջանքերով կազմակերպուած ցուցահանդէսը պիտի օգնէ բարձրաձայնելու սուրիահայ կանանց խնդիրներու մասին եւ աջակցելու անոնց:
Անժելա Աճեմեան իր 3 երեխաներուն հետ Հալէպէն Հայաստան տեղափոխուած է 2014-ին` ամուսինին առեւանգումէն ու սպանութենէն ետք: Անժելան ցուցահանդէսին առաջին անգամ կը տեսնէր իր կեանքի սարսափելի դրուագները` վերարտադրուած կտաւի վրայ:
«Նկարին մէջ ես իմ անձս կը տեսնեմ` քաջ ու հպարտ կանգնած: Կը պատկերացնեմ, որ կապոյտը իմ ընտանիքս է, անցեալս, կարմիրը, վստահ եմ, արիւնն է, կանաչն ալ` ապագաս»:
Երիտասարդ նկարիչ Սիւզաննա Գրիգորեան զարմացած կը հետեւի Անժելայի մեկնաբանութեան: Կ’ըսէ` մինչեւ հիմա Անժելային հետ նկարի մասին չէ խօսած, բայց ան ամէն ինչ կը տեսնէ այնպէս, ինչպէս ինք պատկերած է:
«Շատ ծանր տարած եմ Անժելայի պատմութիւնը, օրեր շարունակ ականջներուս մէջ կը հնչէր: Նոյնիսկ ցաւ կ’ապրէի, որ ան եւս մէկ անգամ ստիպուած էր վերապատմելու: Շատ դժուար է այդքան ուժեղ բնաւորութիւն ունենալ, որ հոգն ու ցաւը իր մէջ` այսպէս հանգիստ ներկայացնէ, ցոյց տայ, որ ամէն ինչ կարգին է»:
Ցուցահանդէսը պիտի գործեց մինչեւ Դեկտեմբեր 16: ան շուտով պիտի ներկայացուի հասարակական վայրերու մէջ: Նկարները պիտի վաճառուին, որուն հասոյթը պիտի տրամադրուի նկարիչին ու անոր հերոսուհիին:
Լուսանկարները` Էմին Արիստակեսեանին
«Մետիամաքս»
