ՀԲԸՄ-ՀԵԸ-ի «Արին» պարախումբը անվարանօրէն դարձած է լիբանանահայ պարարուեստի պարծանքը: Մշակութասէր հանդիսատեսը անհամբերութեամբ կը սպասէ «Արին» պարախումբի ելոյթներուն:
Կիրակի, 3 Դեկտեմբեր 2017-ին Լիբանանի մէջ գործող օտար դիւանագիտական շրջանակներու տիկնանց համախմբումին կազմակերպութեամբ, «ֆենիսիա» պանդոկին մէջ տեղի ունեցաւ միջազգային բարեսիրական պազար: Աւանդութիւն դարձած սոյն պազարին հասոյթը պիտի յատկացուի բարեսիրական հաստատութիւններու:
Լիբանանի մէջ գործող Հայաստանի դեսպանատան հրաւէրով ՀԲԸՄ-ՀԵԸ-ի «Արին» պարախումբը իր մասնակցութիւնը բերաւ պազարի ընթացքին նախատեսուած գեղարուեստական յայտագիրին: Պարախումբը, տիկնանց վարչութիւնը, պարախումբի գեղարուեստական ղեկավար Գայիանէ Մածունեան ՀԲԸՄ-ի Տեմիրճեան կեդրոնէն երկու մեծ օթոպիւսներու ընկերակցութեամբ մեկնեցան «Ֆենիսիա» պանդոկ: Լիբանանի մէջ Հայաստանի դեսպան Սամուէլ Մկրտչեան, ՀԵԸ-ի Կեդրոնական Վարչութեան անդամներ Արթօ Գունտաքճեան, Շահան Սեմերճեան պանդոկի մուտքին դիմաւորեցին պարախումբի կազմը:
Պարախումբին ելոյթները տեղի ունեցան «Ֆենիսիա» պանդոկին մեծ սրահին մէջ: ՀԲԸՄ-ՀԵԸ-ի «Արին» պարախումբի 75 անդամ-անդամուհիներէն միջակ աղջիկները եւ տղաքը ներկայացուցին «Նինօ» եւ «Վասպուրական» պարերը, իսկ մեծ տղաքը եւ աղջիկները՝ «Գողթան» եւ«Վարդագոյն Աղջիկներ» պարերը: Հայ եւ օտար ներկաներ մեծապէս խանդավառուեցան «Արին» պարախումբի ճաշակաւոր եւ բարձրորակ ելոյթներէն: Դիւանագիտական օղակի ներկայացուցիչներ, ոգեւորուած ՀԲԸՄ-ՀԵԸ –ի «Արին» պարախումբի ելոյթներէն, իրենց յարգանքն ու հիացումը յայտնեցին հայ մշակոյթին:
Վարձքը կատար ՀԲԸՄ- ՀԵԸ-ի «Արին» պարախումբի անդամ-անդամուհիներուն, գեղարուեստական ղեկավար Գայիանէ Մածունեանին, պարախումբի տիկնանց վարչութեան ատենապետուհի Անի Պոտրումեանին եւ ժրաջան անդամուհիներուն, որոնք ոչ մէկ ճիգ կը խնայեն բարձր պահելու հայ մշակոյթին փառքն ու աւանդութիւնները:
ՀԵԸ-Ի ՄԱՄԼՈՅ ԵՒ ՏԵՂԵԿԱՏՈՒԱԿԱՆ ԳՐԱՍԵՆԵԱԿ
