Հայաստան դարձած է «Օզոնային շերտի պահպանութեան» մրցանակի արժանացած տարածաշրջանային առաջին երկիրը:
Նոյեմբեր 20-24 Մոնթրէալի մէջ կայացած է «Օզոնային շերտի պահպանութեան մասին» Վիեննայի համաձայնագրին կողմ երկիրներու համաժողովի տասնմէկերորդ եւ «Օզոնային շերտը քայքայող նիւթերու մասին» Մոնթրէալի արձանագրութեան կողմ երկիրներու քսանիններորդ հանդիպումը:
ՀՀ բնապահպանութեան նախարարութեան տեղեկութիւններով այս երկու միջազգային համաձայնագրերը թերեւս ամենայաջողներն են, քանի որ վաւերացուած են ՄԱԿ-ի մէջ արձանագրուած բոլոր 197 երկիրներուն կողմէ: Միջազգային հանրութեան միահամուռ ջանքերուն շնորհիւ՝ ամբողջ աշխարհի մէջ արդէն յաջողած է կրճատել օզոնաքայքայիչ նիւթերուն շուրջ 99%-ը: Կայացած հանդիպումը առանձնայատուկ էր անով, որ այս տարի կը նշուի Մոնթրէալի արձանագրութեան 30-ամեակը: Շատ խորհրդանշական է, որ այդ իսկ հանդիպման ընթացքին պաշտօնապէս յայտարարուեցաւ, որ արձանագրութեան ջերմոցային կազեր հանդիսացող հիտրոֆթորածխածիններ կարգաւորող Գիկալիի ուղղումը արդէն վաւերացուած է 21 երկիրներու կողմէ, որ անհրաժեշտ էր ուղղումը ուժի մէջ մտնելու համար:
Հանդիպման առաջին օրուան աւարտին տեղի ունեցած է Մոնթրէալի արձանագրութեան 30-ամեակին նուիրուած Օզոնի հանդիսաւոր մրցանակաբաշխութիւնը՝ 8 անուանակարգերով: Հայաստանի Հանրապետութեան Օզոնի ազգային կեդրոնը «Կրէատիւ աշխատանք երիտասարդներու հետ» անուանակարգով՝ արժանացաւ «Օզոնային շերտի պահպանութեան» մրցանակին` դառնալով որեւէ մրցանակի արժանացած Արեւելեան Եւրոպայի եւ Կեդրոնական Ասիոյ տարածաշրջանային ցանցի միակ երկիրը:
Հանդիպման ընթացքին Հայաստանի Հանրապետութեան օզոնի հարցերով ազգային համակարգող Լիանա Ղահրամանեան ընտրուած է Վիեննայի համաձայնագրին կողմ երկիրներու 11-րդ հանդիպման համանախագահ:
