Արցախի Հանրապետութեան նախագահ Բակօ Սահակեանի գլխաւորած պատուիրակութիւնը Նոյեմբեր 19-ին աշխատանքային այցով մեկնած է Ֆրանսայի Հանրապետութիւն:
Արցախի Հանրապետութեան նախագահի աշխատակազմի տեղեկատուութեան գլխաւոր վարչութեան փոխանցած տեղեկութիւններով՝ նոյն օրը, նախագահ Սահակեան Փարիզի մէջ այցելած է Ֆրանսայի մէջ «Հայաստան» համահայկական հիմնադրամին կողմէ կազմակերպուած հեռախօսամարաթօնի կեդրոն, հանդիպած հիմնադրամի տեղական կառոյցի պատասխանատուներուն եւ գործընթացին մէջ ընդգրկուած երիտասարդ կամաւորներուն հետ:
Բակօ Սահակեան բարձր գնահատած է «Հայաստան» համահայկական հիմնադրամի Ֆրանսայի մասնաճիւղին մասնակցութիւնը Արցախի մէջ տարբեր ծրագիրներու իրականացման գործին մէջ, շնորհակալութիւն յայտնած հեռախօսամարաթօնի կազմակերպման մէջ ներգրաւուած մարդոց` անոնց կատարած աշխատանքին, Արցախի նկատմամբ ընդգծուած վերաբերմունքին, անոր հոգերով ապրելու եւ մշտական աջակցութեան համար:
