Նոր Ջուղայի՝ Հայ Կանանց Գթութեան միութեան վարչութիւնը, Արցախին զօրակցելու նպատակով կազմակերպուող իր աշխատանքներու ծիրէն ներս, իրականացուցած է Արցախի մէջ արտադրուած՝ մթերքի, մասնաւորապէս՝ միրգ, չրեղէն, սեղանի ծածկոցներու ցուցահանդէս-բարեգործական վաճառք՝ Նոր Ջուղայի հայոց ազգային ծերանոցի յետնաբակին մէջ:
Նոր Ջուղայի ազգային առաջնորդարանի պաշտօնական կայքէն կը տեղեկանանք, որ վերջին երկու տարիներու ընթացքին ասիկա 4-րդ անգամն է, որ Կանանց Գթութեան միութիւնը կը կազմակերպէ Արցախէն բերուած մթերքի վաճառք: Վաճառքի նկատմամբ մեծ եղած է հետաքրքրութիւնը հայ եւ պարսիկ հայրենակիցներուն մօտ: Ամբողջ հասոյթը պիտի յատկացուի Արցախին զօրակցելու ծրագիրներուն:
