Գեղարքունիքի մարզի Լիճք գյուղում Հայաստանի տարածքային զարգացման հիմնադրամի միջոցներով կառուցվում են մշակույթի տուն եւ մանկապարտեզ: Ինչպես «Արմենպրես»-ին տեղեկացրեց Լիճքի գյուղապետ Գնել Գրիգորյանը, շինարարական աշխատանքները մեկնարկել են այս տարվա օգոստոսից եւ ավարտին կհասցվեն տարեվերջին:
Մշակույթի տան եւ մանկապարտեզի կառուցման համար Հայաստանի տարածքային զարգացման հիմնադրամի կողմից հատկացվել է 150 միլիոն դրամ: «Շինարարությունն ընթանում է 1990 թվականից եւ կիսակառույց մնացած մշակույթի տան շենքում, որի երկրորդ հարկը, ըստ նախագծի ապամոնտաժվել է, արդեն ունենալու ենք միահարկ կիսանկուղային կառույց: 10 սենյակ եւ դահլիճ ունենալու է մշակույթի տունը, իսկ մանկապարտեզը նախատեսված է 3 խմբի համար: Մինչեւ տարեվերջ շենքը պատրաստ կլինի շահագործման, իսկ այդ ընթացքում մենք միջոցներ ենք որոնելու կահավորման համար: Ամենայն հավանականությամբ, մանկապարտեզը եւ մշակույթի տունը Լիճքում կբացվեն 2018 թվականին: Կառավարության հոգածությամբ եւս երկու կարեւոր հիմնախնդիր է լուծվում Լիճքում»,-պատմեց համայնքի ղեկավարը:
Խոսրով Խլղաթյան
