Հոկտեմբեր 21-ին, Վարշաւայի քաղաքապետարանը եւ Լեհաստանի մէջ ՀՀ դեսպանութիւնը Լեհաստանի թագաւոր՝ Գազիմիր Մեծ արքային կողմէ, Հայ Առաքելական Սուրբ Եկեղեցւոյ մէջ շնորհուած յատուկ արտօնութեան 650-ամեակին առթիւ, Վարշաւայի մերձակայքը գտնուող «Իմ մայրիկ» անտառին մէջ կազմակերպած էին ծառատունկ, որու ժամանակ տնկած են 650 ծառ:
Ինչպէս կը յայտնեն՝ ԱԳՆ մամլոյ ծառայութենէն, ձեռնարկին պաշտօնական բացման, ողջոյնի խօսքով հանդէս եկան, Վարշաւայի քաղաքապետի տեղակալ՝ Միխալ Օլշչեւսկին, Լեհաստանի մէջ ՀՀ դեսպան՝ Էդգար Ղազարեան եւ Վարշաւայի քաղաքապետարանի ենթակառուցուածքներու վարչութեան տնօրէն՝ Լեշչէկ Տրոգոշչը:
Իր խօսքին մէջ դեսպան Ղազարեան, շնորհակալութիւն յայտնեց Վարշաւայի քաղաքապետարանին ամէն տարի իրականացուող խոշոր բնապահպանական այս նախաձեռնութեան մասնակցութեան հնարաւորութեան համար: Էդգար Ղազարեան նշեց, որ Լեհաստանի պատմութեան ընթացքին հայերը միշտ ալ ունեցած են դրական դերակատարութիւն, որ արձանագրուեցաւ նաեւ Հոկտեմբեր 19-ին, Լեհաստանի Ծերակոյտի յատուկ բանաձեւով: Դեսպանի խօսքով, ապրելով Լեհաստանի մէջ, հայերը այս հասարակութեան մաս կը կազմեն եւ ներքին պարտաւորութիւն կը զգան մասնակից ըլլալու տարբեր ընկերային ծրագիրներու եւ նախաձեռնութիւններու:
Ծառատունկին կը մասնակցէին նաեւ Լեհաստանի մէջ հաւատարմագրուած դեսպաններ, դիւանագիտական մարմնի ներկայացուցիչներ, Վարշաւայի քաղաքապետարանի պատասխանատու պաշտօնեաներ, Վարշաւա բնակող մեծ թիւով հայեր:
Ծառատունկի աւարտը եղաւ ՝ Հայ Առաքելական Սուրբ Եկեղեցւոյ մէջ Լեհահայոց հոգեւոր հովիւ Տաճատ վարդապետ Ծատուրեանի կողմէ, հնչեցուած աղօթքով եւ օրհնութեամբ:
