Հաջորդ տարի հոկտեմբերին Երեւանում կանցկացվի գեղասահքի պատանեկան Գրան Պրիի փուլերից մեկը:
«Արմենպրես»–ի հաղորդմամբ` այս մասին գրում է ՀԱՕԿ-ը: «Ֆեդերացիայի խորհրդի անդամ Սարգիս Թեւանյանի հետ համապատասխան դիմում էինք ներկայացրել Չմշկորդների միջազգային միությանը (ՉՄՄ): Դիմումը հաստատվեց, եւ հաջորդ տարի պատանեկան Գրան Պրիի փուլերից մեկը կանցկացվի Երևանում: Այս մրցաշարին մասնակցում են 13-19 տարեկան գեղասահորդներ: ՉՄՄ-ն ուշադրություն դարձրեց այն հանգամանքին, որ Հայաստանի մայրաքաղաքում գործում է Իրինա Ռոդնինայի անվան գեղասահքի մարզադպրոցը, որը համապատասխանում է միջազգային բոլոր չափանիշերին»,- ասել է Հայաստանի գեղասահքի ֆեդերացիայի նախագահ Մելանյա Ստեփանյանը:
