Իրանի ազգային հարկային ծառայության նախագահի խորհրդական Ռոբերտ Բեգլարյանը Հայաստան-Իրան տնտեսական խոչընդոտները պայմանավորում է վարչարարական բարդություններով ու գործարարների մշակութային ընկալումների տարբերություններով:
«Արմենպրես»–ի հետ զրույցում նա միևնույն ժամանակ նկատեց, որ «ենթահողը պատրաստ է տնտեսական հարաբերությունների ընդլայնման համար»: «Մինչ այժմ երկու երկրների հարաբերություններն ավելի շատ հիմնվել են պետական մասշտաբի տնտեսական հարցերի վրա, ինչպես օրինակ, գազի, ենթակառուցվածքների, բայց ձեռներեցներն այսուհետև կարող են տեղեկանալ մանրամասներին Իրանում աշխատող առևտրային կցորդից, ինչու չէ նաև Իրան-Հայաստան առևտրի պալատից, որը վերջերս վերակտիվացել է հայ գործընկերների շնորհիվ»,-նշեց իրանահայ պաշտոնյան: Նրա խոսքով`պետք է փորձել մաքսային ու հարկային օրենքներն ավելի սահուն դարձնել:
Ռոբերտ Բեգլարյանն ասաց, որ Իրանի կողմից առկա է շահագրգռվածություն Հայաստանի հետ տնտեսական հարաբերությունների խորացման ուղղությամբ` կապված ԵԱՏՄ-ին վերջինի անդամակցությամբ: Դրա համար, ըստ պաշտոնյայի, իրանցի գործարարները պետք է ավելի զգոն ու լրջորեն վերաբերվեն հայկական շուկային` ուշադրություն դարձնելով ապրանքների ստանդարտացման պահանջներին: «Հայաստանն ավելի բաց ու ազատ շուկա է` անկախ սահմանների փակ լինելուց, ներդրումներ են արվում: Հետևաբար, Հայաստանի սպառողն ունի ապրանքների որակի մասին իր ակնկալիքները, և իրանական կողմը պետք է նման մակարդակի որակյալ ապրանքատեսակներ ներմուծի Հայաստան»,-ավելացրեց Ռոբերտ Բեգլարյանը:
Ռոբերտ Բեգլարյանը Հայաստանում ուղեկցում էր Իրանի Իսլամական Հանրապետության ազգային հարկային ծառայության նախագահ, ֆինանսների ու էկոնոմիկայի փոխնախարար Թաղահի Նեժաթին, ով մեր երկրում էր ՀՀ ԿԱ ՊԵԿ նախագահ Վարդան Հարությունյանին հանդիպելու և հարկային ոլորտում երկկողմ կարևորության հարցեր քննարկելու համար:
