ՀՀ վարչապետ Կարէն Կարապետեանի մօտ, Հոկտեմբեր 17-ին, տեղի ունեցած աշխատանքային խորհրդակցութեան ընթացքին, քննարկուած են համայնքներու զարգացման ուղղուած ծրագիրներուն վերաբերող հարցեր:
Տարածքային կառավարման եւ զարգացման նախարար՝ Դաւիթ Լոքեան զեկուցած է այդ նպատակով՝ Հայաստանի քանի մը մարզի մէջ կատարուած ուսումնասիրութիւններու արդիւնքներուն մասին: Նշուած է, որ Տարածքային կառավարման եւ զարգացման նախարարութեան մօտ ամփոփուած է արդէն շուրջ 50 ծրագիր, որոնք ուղղուած են բնակչութեան` եկամուտներ ստանալու հնարաւորութիւններու աւելացման, ներդրումային միջավայրի եւ հասարակական վիճակի բարելաւման:
ՀՀ կառավարութեան տեղեկատուութեան եւ հասարակայնութեան հետ կապերու վարչութեան տեղեկութիւններով՝ վարչապետ Կարապետեանը յանձնարարած է շարունակել աշխատանքները եւ լրամշակել համայնքային զարգացման նպատակով մշակուած ծրագիրները` կարեւոր համարելով անոնց հիմքին յստակ գործարար տրամաբանութեան ներդնումը, որ պիտի նպաստէ համայնքներուն մէջ տնտեսական աշխոյժութեան խթանման, ենթակառուցուածքներու զարգացման եւ աշխատատեղերու ստեղծման:
ՀՀ Կառավարութիւնը Քննարկած է Համայնքային Զարգացման Ուղղուած Ծրագիրները
