ՀՀ Ազգային ժողովի նախագահի տեղակալ Արփինէ Յովհաննիսեան, Հոկտեմբեր 17-ին, ընդունած է Հայաստանի մէջ Գանատայի արտակարգ եւ լիազօր դեսպան Ճոն Ռոնալտ Քիւրը:
ՀՀ Ազգային ժողովի հանրային կապերու վարչութենէն փոխանցուած տեղեկութիւններով՝ Արփինէ Յովհաննիսեան նշած է, որ հայ-գանատական յարաբերութիւնները կայուն կերպով կը զարգանան։ Երկու երկիրները ունին բարեկամութեան ու համագործակցութեան լաւագոյն աւանդոյթներ: ՀՀ ԱԺ փոխնախագահը՝ այս ծիրէն ներս՝ ընդգծած է միջխորհրդարանական կապերու զարգացման կարեւորութիւնը, բարեկամական խումբերու աշխոյժ փոխգործակցութիւնը:
Հայաստանի մէջ Գանատայի արտակարգ եւ լիազօր դեսպանը պատրաստակամութիւն յայտնած է՝ նպաստելու հայ-գանատական խորհրդարանական յարաբերութիւններու առաւել խորացման, փոխայցերու աշխոյժացման: Ճոն Ռոնալտ Քիւրի խօսքով` տարին իւրայատուկ է անոր համար, որ կը նշուի Հայաստանի եւ Գանատայի միջեւ դիւանագիտական յարաբերութիւններու հաստատման 25-ամեակը:
Հանդիպման ընթացքին անդրադարձ եղած է 2018-ին Հայաստանի մէջ ֆրանսախօս երկիրներու գագաթաժողովին իրականացման: Կարեւոր համարուած է համագործակցութիւնը կաշառակերութեան դէմ պայքարին, տեղեկատուական նոր ճարտարագիտութիւններու եւ այլ ոլորտներու մէջ:
