ՀՀ ազգային ժողովի տնտեսական հարցերի մշտական հանձնաժողովի նախագահ Խոսրով Հարությունյանը 2017 թվականի ինն ամսում գրանցված տնտեսական ցուցանիշները հուսադրող է համարում: Նրա խոսքով` առկա է գործարար մեծ ակտիվություն՝ 6-6.1 տոկոս, բյուջեի եկամուտների գերակատարում: «Սա խոսում է այն մասին, որ տնտեսական ակտիվությունն ու տարվա ընթացքում կառավարության կողմից իրականացված քաղաքական նախաձեռնությունները կամաց-կամաց իրենց զգացնել են տալիս: Պետք է արձանագրենք, որ արտահանման բավականին տպավորիչ աճ (21 տոկոս) ունենք թե Եվրամիության երկրներ, թե ԵԱՏՄ ուղղությամբ: Առանձնահատուկ ուզում եմ ընդգծել ԵԱՏՄ արտահանման աճը, որը պայմանավորված է ռեալ սեկտորի տարբեր ոլորտներով»,–«Արմենպրես»-ի փոխանցմամբ` ասաց պատգամավորը:
Ինչպես Խոսրով Հարությունյանն է նշում, եթե ԵՄ Հայաստանից հիմնականում արտահանվում է հումք, հանքահումքային արտադրանք, ապա ԵԱՏՄ երկրներ`
գյուղատնտեսական մթերքներ, վերամշակող և արդյունաբերական այլ ճյուղերի արտադրանք: «Այսինքն` ԵԱՏՄ-ի հետ համագործակցությունը թույլ է տալիս ռեալ սեկտորի տարբեր ոլորտներ զարգացնել և դիվերսիֆիկացված քաղաքականություն իրականացնել»,-ավելացրեց Խոսրով Հարությունյանը:
Անդրադառնալով ներմուծման աճին, որը, ըստ պատգամավորի, 24 տոկոս է, բավականին լավ ցուցանիշ է նախորդ երկու տարիների համեմատ: Տրանսֆերտների, ոչ այնքան մեծ, բայց աճն էլ պատգամավորը պայմանավորում է ռուսական տնտեսության մեջ դրական տեղաշարժերով:
