Հայաստանի մէջ միջազգային ամենաբարձր չափանիշներուն համապատասխանող արհեստագիտական համալսարան պիտի հիմնուի: Նախագահ Սերժ Սարգիսեանին ներկայացուած է Հայաստանի արհեստագիտական համալսարան հիմնելու հայեցակարգը:
Համալսարանի հիմնական նպատակը պիտի ըլլայ բարձր արհեստագիտութիւններու բեկումնային ուղղութիւններու զարգացումը:
Կրթութեան ոլորտի պատասխանատուներու եւ շահագրգիռ այլ անձերու մասնակցութեամբ կայացած խորհրդակցութեան Հանրապետութեան նախագահի խորհրդական Տէր Մեսրոպ քահանայ Արամեան եւ կրթութեան եւ գիտութեան փոխնախարար Դաւիթ Սահակեան իրենց զեկոյցներով անդրադարձած են արհեստագիտական համալսարանի ստեղծման մօտեցումներուն ու սկզբունքներուն:
Անոնք նշած են, որ անցած մէկ տարուան ընթացքին իրականացուած ծաւալուն աշխատանքը, ըստ էութեան, շարունակութիւնն է 2016-ին Մասաչուսէթսի արհեստագիտական հիմնարկ հանրապետութեան նախագահին այցին, որմէ ետք մշակուած է ծրագիր` Հիայաստանի մէջ միջազգային ամենաբարձր չափանիշներուն համապատասխանող արհեստագիտական համալսարան հիմնելու` Մասաչուսէթսի արհեսատգիտական հիմնարկի եւ նման այլ հեղինակաւոր համալսարաններու հետ գործընկերութեան ձեւաւորման ու համագործակցութեան արդիւնքով:
Հայաստանի եւ արտերկրի համալսարաններու ու գիտահետազօտական հիմնարկներու հետ համագործակցութեան շնորհիւ համալսարանի շրջանաւարտները, ըստ զեկուցողներու, հնարաւորութիւն կ՛ունենան ստանալ երկու վկայական` արհեստագիտական համալսարանի եւ գործընկեր համալսարանի կողմէ:
Նախագահը յանձնարարած է լրամշակել հայեցակարգը եւ փաստաթուղթը վերջնական տեսքով ներկայացնել կառավարութեան:
