Հինգշաբթի, 25. 07. 2024

spot_img

Արցախը Այսօր – Արցախի Մէջ Կայացած է Բերքի Տօնը

*ՆՈՐԱՅՐ ՅՈՎՍԷՓԵԱՆ*
«Զարթօնք»ի Արցախի Աշխատակից

Հոկտեմբեր 8-ին, Արցախի մէջ կը նշուի գիւղատնտեսութեան ոլորտի աշխատողի մասնագիտական օրը: Արդէն 7-րդ տարին է՝ այդ օրը տօնական կը դառնայ ո՛չ միայն գիւղատնտեսութեամբ զբաղողներու համար: Այդ օրը, Ստեփանակերտի մէջ կը կազմակերպուի Բերքի տօնը: Գիւղատնտեսութեան նախարարութիւնը, ճանապարհածախսը տրամադրելով, աջակցած է, որ գիւղամթերք արտադրողներն ու վերամշակողները իրենց արտադրանքը Ստեփանակերտ հասցնեն, պայմանով, որ տօնավաճառին մէջ, գիները շուկայականէն 15-20 տոկոսով ցած ըլլան: Արցախի Հանրապետութեան գիւղատնտեսութեան նախարար Ժիրայր Միրզոյեանը կը վստահեցնէ՝ տարուէ տարի կ՝աւելնայ «Բերքի տօն»-ի մասնակիցներուն եւ այցելուներուն թիւը. «Նախորդ տարուան համեմատ` այս տարի աւելցած է աւելի քան 250 տաղաւար: Տօնավաճառին` Արցախի բոլոր շրջաններու 167 համայնքներէն՝ կը մասնակցի շուրջ 1000 դիմորդ»: Ներկայացուած տեսականին բազմազան է՝ աւանդական արցախեան նուռ ու խաղողէն՝ մինչեւ արեւադարձային միրգեր: Վերամշակողներն ալ բաւական հարուստ ընտրութիւն կ՝առաջարկէին՝ տասնեակ գինիներ, մրգային օղի, հիւթեր, ռուպ. Անոնք՝ աւանդականի շարքէն: Նորոյթներ ալ կային, օրինակ, բնական օճառ՝ պատրաստուած Քաշաթաղի շրջանի Գողթանիկ գիւղէն:

                Շրջաններէն ամենաաշխոյժը, արդէն հերթական տարին, կը մնայ Քաշաթաղը՝ իր տաղաւարներուն թիւով ու ներկայացուցած տեսականիի բազմազանութեամբ: Քաշաթաղի հատուածին նոյնիսկ ձեւաւորուած էր բազմազգ խոհանոց ներկայացնող տաղաւար:

                Ստեփանակերտի կեդրոնական՝ Վերածնունդի հրապարակին վրայ կայացած «Բերքի տօն»-ին մասնակցած է նաեւ «Թարինջ» ընկերութիւնը: Անիկա գիւղատնտեսական համագործակցութիւն է, որ հիմնադրուած է քանի մը ամիսէ, որ կ՝աշխատի վերականգնուող Թալիշ գիւղին մէջ: Բերքի տօնին ներկայացուցած է իր արտադրանքը՝ մեղր, պտուղ, խմիչք:

Բերքի տօնին՝ տարուան բերք ու բարիքը եւ զայն արտադրողը օրհնած է ՀԱԵ Արցախի թեմի առաջնորդ Պարգեւ արքեպիսկոպոս Մարտիրոսեանը: Իսկ նախագահ Բակօ Սահակեանը, Արցախի բարձրաստիճան պաշտօնեաներուն հետ, տաղաւար առ տաղաւար շրջած է տօնավաճառով: Ի դէպ, տօնավաճառի այցելուներուն մէջ եղած են նաեւ քալիֆորնիացի պատգամաւորները, որոնք այս օրերուն կը գտնուէին Արցախ:

Արդիւնքները դեռ ի մի կը բերուին: Նախնական տուեալներով, ըստ կազմակերպիչներու, Բերքի տօնի այցելուներուն թիւը անցած է 30 հազարը:

Ստեփանակերտ

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին