«Գեղարվեստական տպագրության առաջին միջազգային բիենալե. Երևան-2017»-ին կցուցադրվի 228 արվեստագետի 449 աշխատանք 50 երկրից: Բիենալեի բացման հանդիսավոր արարողությունը տեղի կունենա հոկտեմբերի 25-ին Նորարար փորձառական արվեստի կենտրոնում (ՆՓԱԿ): Այս մասին հոկտեմբերի 11-ին լրագրողների հետ հանդիպմանը խոսեցին բիենալեի կազմակերպիչները:
«Լեհաստանից մասնակցում են 33 արվեստագետ, Չինաստանից` 32, Գերմանիայից` 26, ԱՄՆ-ից և Հայաստանից՝ 13-ական մասնակից են ընդգրկվել, Ֆրանսիայից` 10: Նրանցից յուրաքանչյուրը երկու-երեք աշխատանք է ներկայացրել: Ընդգծեմ, որ այս բիենալեն կազմակերպվում է մեր հիմնադրամի հնգամյակի կապակցությամբ»,- «Արմենպրես»–ի հաղորդմամբ` նշեց «Մշակույթների երկխոսություն» կազմակերպության հիմնադիր նախագահ, բիենալեի միջազգային ժյուրիի անդամ Սոնա Հարությունյանը:
Գեղարվեստական տպագրության առաջին միջազգային բիենալեի նպատակն այս ոլորտում առկա մերօրյա զարգացումների, միտումների ուսումնասիրությունն ու բացահայտումն է, դասական, այսօր հազվադեպ հանդիպող տեխնիկաների և արդի գաղափարների միախառնման մշտադիտարկումը:
Բիենալեի կազմկոմիտեի անդամ, նկարիչ Արման Վահանյանի խոսքով` բիենալեի նպատակը գեղարվեստական տպագրության բնագավառում ստեղծագործող արվեստագետներին նոր հարթակում ներկայանալու հնարավորություն ընձեռելն է: «Այս միջոցառումը մեծ հետաքրքրություն է առաջացրել: Առաջին փուլի համար դիմել են 955 արվեստագետ 76 երկրից: Սակայն միջազգային ժյուրին ներկայացված աշխատանքներից ընտրել է 449 գործ: Հուսանք, որ բիենալեն հաջողություն կունենա, և մեր երկրում արվեստի այս տեսակը կզարգանա»,-ասաց Վահանյանը:
Նկարիչ Արթուր Հակոբյանն ընդգծեց, որ նմանատիպ աշխատանքները մեծ ցուցահանդեսներում շատ քիչ են ներկայացվել, և այս բիենալեն մեկ վայրում բազմաթիվ գրաֆիկական գործեր ցուցադրելու, դրանք հանրության լայն շրջանակին մատուցելու հիանալի հնարավորություն է տալիս:
«Կարծում եմ` այն մեծ հետաքրքրություն կառաջացնի հատկապես ուսանողների, երիտասարդ արվեստագետների շրջանում, ովքեր նորովի են ընկալում, ներկայացնում այս արվեստը: Մեր երկրի համար սա աննախադեպ իրադարձություն է, իսկ ներկայացված աշխատանքների որակն ու քանակը՝ հուսադրող»,-նշեց նա:
Անդրադառնալով առաջին, երկրորդ, երրորդ և չորրորդ տեղերի համար շնորհվող մրցանակներին` Հակոբյանը շեշտեց, որ դրանք հուշամեդալներ են, որոնց հեղինակը նկարիչ, քանդակագործ Մելիք Շահնազարյանն է:
Միջազգային ժյուրիի կազմում են անվանի մասնագետներ Գերմանիայից, Էստոնիայից, Շվեյցարիայից, Լեհաստանից և Հայաստանից:
Մեր օրերում թվային տեխնոլոգիաների միջոցով գեղարվեստական տպագրության նմուշի ստեղծումը համեմատաբար հեշտ է: Սակայն կան որոշ արվեստագետներ, որոնք հրաժարվում են դրանց օգնությամբ աշխատելուց և նախընտրում են աշխատատար վտանգավոր թթուների, թունավոր լուծիչների, յուղային հիմքով տպագրական ներկերի կիրառմամբ ուղեկցվող ավանդական եղանակները:
Բիենալեի մրցանակաբաշխությունը տեղի կունենա հոկտեմբերի 28-ին:
